QR Densaýlyq saqtaý ministri Aleksei Tsoi el turǵyndaryn qoldan jasalǵan ókpeni jasandy jeldetý apparattaryn paidalanbaýǵa shaqyrdy, dep habarlaidy QazAqparat.
«Áleýmettik jelilerdegi azamattardyń óz qoldarymen jasap alýǵa tyrysyp jatqan ár qily tásilderin kórip otyrmyz. Olar túrli quraldar arqyly tynys alý qyzmetterin jaqsartýǵa tyrysady. Qoldan jasalǵan qurylǵyny internetten kórip alyp, úilerinde ózinshe em alý úshin jasap alady. Bul rette, barynsha saqtyq tanytý qajet», - dedi ministr búgin Ortalyq kommýnikatsiialar qyzmetindegi brifingide tilshilerdiń saýalyna orai.
Ministrdiń túsindirýinshe, apparatqa quiylatyn suiyqtyq taza bolmai qalsa, onda bul jait ókpeniń túrli bakteriialarmen zaqymdanýyna alyp keledi.
«Qoldan jasalǵan mundai qurylǵylarǵa barynsha saqtyqpen qaraǵan jón. Aýrýdyń asqynýyna alyp kelýi múmkin táýekel barlyq ýaqytta bolady. Ókinishke orai mundai faktiler tek bizde ǵana oryn alyp otyrǵan joq. Sondyqtan azamattarymyzdy saqtandyrýymyz qajet», - dedi Aleksei Tsoi.
