Densaýlyq saqtaý ministri Aleksei Tsoi Atyraýda epidemiologiialyq ahýalǵa bailanysty aimaqtyq shtabtyń otyrysyn ótkizdi, dep habarlaidy "Ult aqparat".
Atyraý oblysynda juqpaly aýrýlar aýrýhanalarynda tósek-oryndardyń qamtylýynyń birtindep ósýi baiqalady. Máselen, 5 tamyzdaǵy jaǵdai boiynsha 1 734 naýqas statsionarlyq em alýda. Bul 5 shildedegi statistikanyń 3,5 esege óskenin kórsetedi. Reanimatsiialyq kereýetterde 76 naýqas jatyr. Mundaǵy júkteme 5 shildeden beri 2,5 esege ósken.
Oblysta barlyǵy 16 statsionar bar. Onyń 7-eýi aýdandar, al, 9 statsionar Atyraý qalasynda ornalasqan. Atyraý qalasynda tósek-oryn júktemesi artqan. Munda 6 statsionardyń 4-eýinde júkteme 97%-dy qurap otyr. Atyraý qalasynda infektsiialyq tósek-orynnyń júktemesi 60%, reanimatsiialyq kereýetter júktemesi 67%-ǵa ósken.
Sondai-aq, modýldi aýrýhanada reanimatsiialyq kereýetterdiń jetispeýshiligi baiqalady. Aýrýhanada 19 reanimatsiialyq kereýettiń 95%-y naýqastarǵa tolǵan. Al kardiologiialyq ortalyqtaǵy 11 kereýettiń 92%-ynda naýqastar emdelip jatyr.
«Bul – alańdaýshylyq týǵyzatyn jaǵdai. Óitkeni, júktemeniń artýy kereýettiń jetispeýshiligine, turǵyndarǵa statsionarlyq kómek kórsetýdiń tómendeýine ákelip soǵýy múmkin», - dedi Densaýlyq saqtaý ministriniń orynbasary Ajar Ǵiniiat.
Osy aptada Densaýlyq saqtaý ministrliginiń jumys toby Atyraý qalasyndaǵy 5 emhanada, 2 jekemenshik emhanada, sondai-aq, eki aýdandyq aýrýhanada monitoring júrgizdi. Taldaý nátijesinde jyljymaly brigadalar sanynyń jetkiliksizdigi, QIAJ-ge qońyraýdyń ýaqytynda engizilmeýi baiqaldy. Bul bir jyljymaly brigadaǵa naqty júktemeni kórsetpeitini anyq.
Ajar Ǵiniiattyń aitýynsha, barlyq meditsinalyq uiymda naýqastardy ambýlatoriialyq baqylaý tiisti deńgeide emestigi anyqtalǵan. Baqylaý paraqtary sapasyz júrgizilgen. KVI juqtyrǵandardy emdeýge arnalǵan klinikalyq hattamalar saqtalmaidy. Dárigerler egde jastaǵy emdelýshilerge qatysty qyraǵylyq tanytpaidy. Jyljymaly brigadadaǵy dárigerlerdiń mindetin ýchaskelik qabyldaýdaǵy jumyspen biriktirý jaǵdaiy kezdesedi. Bul sanitarlyq-epidemiologiialyq rejimniń saqtalýyna qaishy keledi.
Densaýlyq saqtaý ministrliginiń usynysymen Atyraý qalasynda naýqastardyń tirkelýin, mobildi toptardyń jumysyn baqylaý úshin sitýatsiialyq ortalyqtar qurylǵan. Oǵan naýqastardy aýrýhanaǵa jatqyzý, ambýlatorlyq emniń ýaqtyly taǵaiyndalýy, dári-dármekpen tegin qamtamasyz etý kiredi.
Ministr Aleksei Tsoidyń pikirinshe, Atyraý oblysynda KVI aýrýshańdyǵynyń edáýir ósýi turǵyndardyń sanitarlyq-epidemiologiialyq talaptardy saqtamaýynan bolyp otyr. Naýqastardy aýrýhanaǵa jatqyzý paiyzynyń joǵarylaýyna «Delta» agressivti shtamymen jáne ambýlatorlyq-emhanalyq jumystyń jetkiliksiz uiymdastyrylýy áser etken. Bul jaǵdaiy aýyr naýqastardyń kóbeiýine yqpal etken.
Osyǵan bailanysty Atyraý oblystyq densaýlyq saqtaý basqarmasyna shuǵyl túrde oryndalýy tiis birqatar usynystar berildi.
