Densaýlyq saqtaý ministri Aleksei Tsoi jumys saparymen Aqtóbege keldi. Óńirde koronavirýs infektsiiasyna qarsy shtabtyń otyrysy ótti, dep habarlaidy "Ult aqparat" oblys ákiminiń baspasóz qyzmetine silteme jasap.
Shtab otyrysyna oblys ákiminiń birinshi orynbasary Rýslan Hambarov, QR Densaýlyq saqtaý ministrliginiń ókilderi, Aqtóbe oblysy departamentteriniń, alǵashqy meditsinalyq-sanitarlyq kómek kórsetý uiymdarynyń basshylary, aýdan ákimderi beine bailanys arqyly qatysty.
«Uiymdasqan-ádistemelik kómek kórsetý úshin óńirge Densaýlyq saqtaý ministrliginiń jumys toby jiberilgen bolatyn. Bizdiń mindetimiz - barlyq ózekti máselelerdi qarap anyqtaý jáne qaisysyn erekshe baqylaýǵa alý keregin túsiný», - dedi Aleksei Tsoi.
Basqosýda oblystyq sanitariialyq-epidemiologiialyq baqylaý departamenti men densaýlyq saqtaý basqarmasynyń basshylary epidemiologiialyq jaǵdai týraly baiandady.
Pandemiia bastalǵaly óńirde 14 myńnan astam adamnan koronavirýs infektsiiasy anyqtaldy.
Ázirlengen 24 infektsiialyq statsionardyń 18-i iske qosylǵan. 795 kereýetke adam jatqyzylsa, onyń 115-i reanimatsiialyq, 2808 kereýet rezervte.
37 meditsinalyq mekeme halyqqa ambýlatoriialyq-emhanalyq kómek kórsetedi. 173 mobildi brigada jumys isteidi.
Meditsinalyq mekemelerdiń materialdyq-tehnikalyq bazasyn nyǵaitatyn jáne olardy dári-dármekpen qamtamasyz etetin barlyq qajetti sharalar qabyldandy.
Oblysqa 398 575 doza vaktsina ákelinse, birinshi komponentimen 206 271 adam, ekinshi komponentimen 12 304 adam egildi.
Reid nátijesi boiynsha 47 baqylaý toby 57 mln teńgege 464 aiyppul saldy.
Biznestiń 930 sýbektisi Ashyq qosymshasyn qoldanady. Oqshaýlaý tártibin buzǵan 204 adam anyqtalyp, «qyzyl» mártebesi bar bes aqtóbelik ákimshilik jazaǵa tartyldy.
Densaýlyq saqtaý vitse-ministri Ajar Ǵiniiat koronavirýs infektsiiasyna shaldyqqan naýqastarǵa meditsinalyq kómek kórsetý jaiyn aitty.
QR DM SEBK tóraiymy Aijan Esmaǵambetova epidemiologiialyq jaǵdaidyń saraptamasyn usyndy.
QR Densaýlyq saqtaý ministrligi jumys tobynyń usynystaryn oryndaý maqsatynda oblystyq densaýlyq saqtaý basqarmasy janynan, sonymen qatar, alǵashqy meditsinalyq-sanitariialyq kómek kórsetý uiymdarynda ahýaldyq ortalyqtar uiymdastyrylyp, M.Ospanov atyndaǵy BQMÝ professor-oqytýshylar quramyn tarta otyra onlain tártibinde satylai oqytý júrgizildi.
«Bizdiń mindetimiz - koronavirýsqa qarsy kúreste búkil kúshti biriktirip, Memleket basshysynyń meditsinalyq mekemelerdi jaryqtandyrý, naýqastardy emdeý ádisin engizý jáne basqa da ózekti suraqtardy sheshý boiynsha tapsyrmalaryn oryndaý jumystaryn kúsheitý. Biz barlyq baǵyt boiynsha qoldaý kórsetýge daiynbyz», - dep qosty Densaýlyq saqtaý ministri.
Otyrys sońynda oblys ákiminiń birinshi orynbasary Rýslan Hambarov jumys tobynyń usynystaryn oryndaý jáne meditsinalyq kómek kórsetý sapasyn jaqsartý boiynsha barlyq shara qabyldanatynyn aitty.
«Aqtóbeniń desaýlyq saqtaý salasynyń áleýeti joǵary. Eń bastysy - jaqsy materialdyq-tehnikalyq baza, joǵary bilikti mamandar bar», - dep atap ótti ol.
