Reseilik oppozitsioner Aleksei Navalnyidyń densaýlyǵy birshama ońaldy. Muny Berlindegi “Sharite” emhanasynyń dárigerleri habarlady. Olardyń aitýynsha, Navalnyidy jasandy komadan shyǵarǵan. Endi ony ókpeni jasandy jeldetý apparatynan birtindep ajyratyp jatyr.
Navalnyi ózine aitylǵan sózderge isharamen jaýap qatqan.
Dárigerler Navalnyidyń boiyn jailaǵan ý onyń densaýlyǵyna áli uzaq zardabyn tigizýi múmkin deidi.
Aleksei Navalnyi 20 tamyzdan beri, iaǵni 19 kún komada jatyr. Ol “Sharite” emhanasynda 22 tamyzdan em ala bastady. Germaniia astanasyna ony Reseidiń Omby qalasynan alyp kelgen. Ushaqta ketip bara jatqan Navalnyidyń densaýlyǵy kúrt nasharlaǵan soń jolaýshy ushaǵy Omby qalasyna qonýǵa májbúr bolǵan.
Ótken aptada Germaniia basshylyǵy Navalnyidyń aǵzasynan “Novichok” tobyna jatatyn ýdyń izi tabylǵanyn málimdedi. Germaniia kantsleri Angela Merkel Máskeýdi oppozitsiiadaǵy saiasatkerdiń basyndaǵy bul jaǵdaidy jan-jaqty zertteýge shaqyrdy. Resei biligi Navalnyidy Ombyda emdegen dárigerlerge siltei otyryp, saiasatker ýlanǵan degen aqparǵa kúmán keltirdi. Oqiǵaǵa qatysty qylmystyq is áli qozǵalǵan joq.
