رەسەيلٸك وپپوزيتسيونەر الەكسەي ناۆالنىيدىڭ دەنساۋلىعى بٸرشاما وڭالدى. مۇنى بەرليندەگٸ “شاريتە” ەمحاناسىنىڭ دەرٸگەرلەرٸ حابارلادى. ولاردىڭ ايتۋىنشا, ناۆالنىيدى جاساندى كومادان شىعارعان. ەندٸ ونى ٶكپەنٸ جاساندى جەلدەتۋ اپپاراتىنان بٸرتٸندەپ اجىراتىپ جاتىر.
ناۆالنىي ٶزٸنە ايتىلعان سٶزدەرگە يشارامەن جاۋاپ قاتقان.
دەرٸگەرلەر ناۆالنىيدىڭ بويىن جايلاعان ۋ ونىڭ دەنساۋلىعىنا ەلٸ ۇزاق زاردابىن تيگٸزۋٸ مٷمكٸن دەيدٸ.
الەكسەي ناۆالنىي 20 تامىزدان بەرٸ, ياعني 19 كٷن كومادا جاتىر. ول “شاريتە” ەمحاناسىندا 22 تامىزدان ەم الا باستادى. گەرمانييا استاناسىنا ونى رەسەيدٸڭ ومبى قالاسىنان الىپ كەلگەن. ۇشاقتا كەتٸپ بارا جاتقان ناۆالنىيدىڭ دەنساۋلىعى كٷرت ناشارلاعان سوڭ جولاۋشى ۇشاعى ومبى قالاسىنا قونۋعا مەجبٷر بولعان.
ٶتكەن اپتادا گەرمانييا باسشىلىعى ناۆالنىيدىڭ اعزاسىنان “نوۆيچوك” توبىنا جاتاتىن ۋدىڭ ٸزٸ تابىلعانىن مەلٸمدەدٸ. گەرمانييا كانتسلەرٸ انگەلا مەركەل مەسكەۋدٸ وپپوزيتسيياداعى ساياساتكەردٸڭ باسىنداعى بۇل جاعدايدى جان-جاقتى زەرتتەۋگە شاقىردى. رەسەي بيلٸگٸ ناۆالنىيدى ومبىدا ەمدەگەن دەرٸگەرلەرگە سٸلتەي وتىرىپ, ساياساتكەر ۋلانعان دەگەن اقپارعا كٷمەن كەلتٸردٸ. وقيعاعا قاتىستى قىلمىستىق ٸس ەلٸ قوزعالعان جوق.
