Berlindegi "Sharite" klinikasy reseilik oppozitsiialyq saiasatker Aleksei Navalnyidyń aýrýhanadan shyqqanyn habarlady. Ol klinikada 32 kún jatqan.
Klinika saitynda jariialanǵan málimetke sáikes, oppozitsiialyq saiasatkerdiń densaýlyǵy jaqsarǵandyqtan dárigerler ony statsionardan shyǵarýdy jón kórgen.
Dárigerler Navalnyidyń tolyq aiyǵatynyn, alaida ýdyń áseri áli uzaq saqtalýy múmkin ekenin aitady.
Klinika habarlamasyna sáikes, aýrýhanada bir aidan astam ýaqyt jatqan Navalnyi 24 kúnin reanimatsiiada ótkizgen.
44 jastaǵy Aleksei Navalnyi 20 tamyzda Novosibirskide jemqorlyq týraly zertteý júrgizip qaityp kele jatqan jolda ushaqta jaǵdaiy kúrt nasharlap, komaǵa túsken. Omby aýrýhanasynda eki kún jatqannan keiin týystary men jaqtastarynyń talabymen Berlindegi "Sharite" klinikasyna aýystyrylǵan.
Germaniia dárigerleri onyń aǵzasynan sovet kezinde jasalǵan "Novochik" áskeri ýynyń qaldyqtary tabyldy degen. Al Resei biligi "saiasatkerdiń aǵzasynan ý tabylmady" degen Omby aýrýhanasy mamandarynyń aitqandaryn alǵa tartyp, nemis ǵalymdarynyń deregine kúmán keltiredi. Batys Reseiden máselege tolyq túsinikteme berýdi talap etip otyr.
Buǵan deiin Navalnyi jazylǵannan keiin Reseige oralyp, qyzmetin jalǵastyrǵysy keletinin aitqan.
