Petropavlǵa olimpiada chempiony, velosport juldyzy Aleksandr Vinokýrov kelip, izbasarlary – jas sportshylarmen kezdesti, dep habarlaidy "Ult aqparat".
SQO dene shynyqtyrý jáne sport basqarmasy baspasóz qyzmetiniń málimetinshe, «Astana Pro Team» kásibi velokomandasynyń bas menedjeri Aleksandr Vinokýrov Petropavlda velosport boiynsha olimpiadalyq rezervtegi balalar men jasóspirimderdiń oblystyq mamandandyrylǵan mektebiniń tárbielenýshilerimen kezdesti.
Olimpiada chempiony týǵan jerge jii kelýge tyrysady. SQO Beskól aýylynda onyń ata-anasy turady. Týǵan-týystarymen kezdesip qana qoimai, ózi bala kezinde jattyqqan sport mektebine bas suǵady, jattyqtyrýshylarmen, jas sportshylarmen kezdesedi.
Petropavldaǵy № 17 orta mekteptiń jertólesinde velomekteptiń bazasy ornalasqan. Bul jerde búginde 60 bala jattyǵyp júr. Jalpy velosport boiynsha olimpiadalyq rezervtegi balalar men jasóspirimderdiń oblystyq mamandandyrylǵan mektebinde 260 tárbielenýshi bar.
Aleksandr Vinokýrovtyń aitýynsha, Soltústik Qazaqstan oblysy velosporttan bolashaq chempiondardy daiarlaýda elimiz boiynsha aldyńǵylardyń qatarynda.
Bul – osy sport túrin damytýǵa qoldaý bildirip otyrǵan óńir basshylyǵynyń jáne jergilikti metsenattardyń arqasy.
Osyndai demeýshilerdiń biri – velosiped sporty oblystyq federatsiiasynyń prezidenti Muhtar Igibaev. Ol óz qarajatyna iri jarystar uiymdastyryp, halyqaralyq, respýblikalyq saiystarda úzdik nátije kórsetken mektep tárbielenýshilerine jáne olardyń jattyqtyrýshylaryna syiaqy berýdi dástúrge ainaldyrǵan.
Biyl №17 orta mekteptiń jertólesinde ornalasqan velobazany kúrdeli jóndeýge 7 mln teńge bóldi. Nátijesinde nysannyń ishi jyly, jaryq jáne jeldetý júiesin jańartqandyqtan sportshylarǵa jattyǵý barysynda demalý jeńildedi.
Vinokýrov tárbielenýshilermen tildesip, jattyǵýlaryna qatysty. Bolashaq chempiondarǵa aqyl-keńesin berdi.
Búginde «Vino-Astana Motors» komandasyna 12 soltústikqazaqstandyq sportshy múshe, onyń úsheýi qatarǵa biyl qosyldy.
Al «Astana Pro Team» komandasy quramynda Qyzyljar óńiriniń týmasy 20 jastaǵy Gleb Brýsenskii óner kórsetip júr.
