Astanada «EKSPO-2017» kórmesiniń biletterin satatyn kassalar resmi túrde ashyldy.
Olimpiada chempiony Aleksandr Vinokýrov pen ǵaryshker Aidyn Aiymbetov «EKSPO-2017» kassalarynyń resmi ashylýynda bolyp, biletter satyp aldy. Vinokýrov dostary men otbasyna arnap 10 bilet satyp aldy.
«Men naqty qai kúni kele alatynymdy bilmeimin, sol sebepti biletti demalys kúnderdiń birine arnap satyp aldym. Ata-anama, otbasyma, dostaryma arnap 10 bilet aldym. Eýropada balalarǵa jazǵy demalys bastalǵan kezde, iaǵni, maýsym-shilde ailarynyń birinde kelemiz dep oilaimyn. Bizdiń «AstanaTeam» komandamyz EKSPO-nyń elshisi sanalady, sondyqtan biz mindetti túrde kelemiz», - deidi veloshabandoz.
Aleksandr uiymdastyrýshylardy árqashan qoldaý qajettigin aitady. Onyń aitýynsha, shet elderde júrgen kezinde Qazaqstanda «EKSPO-2017» kórmesi ótetinin kópshiligi biledi eken.
Óz kezeginde EKSPO-nyń qurmetti elshisi, ǵaryshker Aidyn Aiymbetov 2017 jyly kórmege milliondaǵan qonaq keledi dep esepteidi.
«Kórmeni kópshilikke nasihattaý – elshilerge jaýapty mindet júkteidi. Mundai is-shara úlken jańalyqtyń belgisi. Birinshiden, ishki naryqta jańa jumys oryndary paida bolady, infraqurylym jańarady, qonaq úiler, jańa úiler turǵyzylady. Bunyń bári Qazaqstannyń halyqaralyq naryqta bedelin arttyra túsedi. Biz kórmege miliondaǵan adamdar keledi dep kútemiz. Tarihqa kóz júgirtsek, eń alǵashqy uialy telefon men kompiýterler EKSPO kórmesi arqyly ómirge jol tartty. Men qazir ashyq kúnderdiń birine arnap bilet satyp aldym», - deidi ǵaryshker.
«Qazpochta» AQ qarjy jáne agenttik qyzmetter bóliminiń basshysy Ainur Kúnhajaevanyń aitýynsha, satylym bastalǵan kúnnen beri 500 bilet ótip úlgergen. Uiym halyqty shaqyrý hám tartý boiynsha orasan jumystar atqaryp jatyr. Jaqyn kúnderi satylymdy júzege asyratyn qosymsha 2,5 myń bólimshe ashylmaq.
«Biz, eń aldymen, úlken joba jasadyq. Satylymdy jarnamalaimyz, sosyn úlken keshter men sharalarda tolyq aqparat berip, taratamyz. Sol sebepti, bul baǵytta jaqsy yqpaldastyq ornattyq dep aitýǵa bolady. Qaramaǵymyzda 3 myń bólimshe bar, al búgin sonyń 1 myńy jumys jasap tur. Biletterdi 3 myń operator satady(ár bólimshede úsheýden). Kórme bastalǵansha, áli 2,5 myń bólimshe ashamyz degen oi bar», - deidi ol.
Sonymen qatar, biletterdi QR Konstitýtsiia Kúni men Astana kúni, kórmeniń ashylý jáne jabylý kúnderinen bólek, qai kúnge yńǵaily, sol kúnge arnaiylap alýǵa bolady. Al, joǵarydaǵy erekshe 4 kúnde tek syily biletterge ie bolǵan qurmetti qonaqtar ǵana kire alady.
Astanadaǵy negizgi satylym bólimshesi «Kerýen» OSO-da ornalasqan. Qosymsha kassa - «Han-Shatyr» oiyn-saýyq ortalyǵynda.
Al, Almaty shaharynda biletterdi "MEGA Alma-Ata" jáne "MEGA Park" ortalyqtarynan alýǵa bolady.
