Astana qalasynda Ortalyq kommýnikatsiialar qyzmetinde oblys ákimi Amandyq Batalov baspasóz máslihatyn ótkizdi. Jiynda óńir basshysy biylǵy toǵyz aidyń ishindegi áleýmettik-ekonomikalyq damý qorytyndylary men memlekettik baǵdarlamalardyń júzege asýy týraly baiandap, tilshiler qaýymy qoiǵan suraqtarǵa jaýap berdi.
Óz sózinde: "Elbasy Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynda júktelgen jáne aimaq turǵyndarynyń ál-aýqatyn arttyrý baǵytynda berilgen tapsyrmalardy oryndai otyryp, qarqyndy ilgerileýge qol jetkizdik. Oń dinamika barlyq sektorlarda baiqalatynyn basa aitqym keledi", – dep bastaǵan óńir basshysy Jetisý jerindegi halyq sanynyń 2 millionnan asqanyn, biylǵy qańtar-qyrkúiek ailary aralyǵynda ekonomikanyń barlyq salalarynda kóńilge qonymdy sharýalar atqarylǵanyn atap ótti.
– Aitalyq, ónerkásiptiń ósimi 4,3 paiyzdy qurasa, biylǵy kólemi 700 milliard teńgeden asady. Jetisý óńiri shyryndar men alkogolsiz sýsyndardyń negizgi óndirýshisi sanalatyndyqtan jylyna 1 milliard litrge deiin ónim óndiriledi. Indýstriialandyrý kartasy aiasynda farmatsevtikanyń jańa salasy qurylǵanyn maqtanyshpen jetkizemin. 9 farmatsevtikalyq zaýyttyń óndiris kólemi esepti merzimde 2 eseden astam ósip, 13 milliard teńgege deiin jetti. Sonymen qatar «Qairat» indýstriialyq aimaǵynyń infraqurylymyn salý bastaldy. Ónerkásiptik aimaqtarda barlyǵy 17 kásiporyn jumys isteidi, aldaǵy ýaqytta 400-ge jýyq óndiris ornyn asha alamyz.
Óńir basshysy investitsiia tartý maqsatynda jyl basynan beri 9 biznes-kezdesý ótkenin, 7 memlekettiń óńirleri men kompaniialary arasynda memorandýmdar men kelisimder jasalǵanyn aitty. Investorlar ásirese «Qorǵas – Shyǵys qaqpasy» arnaiy ekonomikalyq aimaǵyna aitarlyqtai qyzyǵýshylyq tanytqan. Sonyń arqasynda jalpy quny 644 milliard teńge bolatyn 24 joba josparlanǵan. Jalǵasyp kele jatqan jumystardyń qorytyndysynan investitsiialardyń ósýin ańǵarý qiyn emes. Máselen, biyldyń ózinde tartylǵan investitsiia mólsheri 500 milliard teńgeden asyp jyǵylǵan.
Aýylsharýashylyǵy salasyndaǵy atqarylǵan sharýalardy da áńgimelegen Amandyq Batalov topyraǵy qunarly ólkeniń jetistigin saralady.
– Memleket basshysy atap ótkendei, agrarlyq sektor ekonomikalyq ósimniń qozǵaýshy kúshi bolýy kerek. Bul saladaǵy jalpy ónim kórsetkishteri oblysymyzdyń respýblika boiynsha birinshi orynda turǵanyn aiǵaqtaidy, iaǵni, kórsetkish 17 paiyzdy quraidy. Sózimdi naqty derektermen shegelei tússem, búkil Qazaqstandaǵy soianyń 97 paiyzy Almaty oblysynda ósiriledi. Júgeri men qant qyzylshasynyń 64 paiyzy, jemis-jidektiń 37 paiyzy, kókónistiń 25 paiyzy, et ónimderiniń 20 paiyzy, sút ónimderiniń 13 paiyzy jáne jumyrtqanyń 23 paiyzy Jetisý jerine tiesili, – degen ákim jurtshylyq nazar aýdarǵan kórsetkishtermen tanystyrdy. – Aýylsharýashylyǵy daqyldarynyń kólemi 948 myń gektardy qurasa, onyń 17 paiyzdan astamy ozyq tehnologiialardy paidalana otyryp óńdeledi. Osyndai qoldaýdyń arqasynda oblysymyz búginde qyzylsha kóptep ósiriletin aimaqqa ainalyp otyr.
Mysaly, biyl qyzylsha daqyly 9 myń gektarǵa salyndy. Kóksý qant zaýyty úshinshi jyl óz jumysyn sátti aiaqtap, tolyqtai jańartyldy.
