Aldaǵy 5 jylda aýyl turǵyndaryna 250 mlrd teńge shaǵyn nesie beriledi. Bul týraly Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Aýylda shaǵyn nesie berý jalǵasatyn bolady. Ótken jyldyń ózinde bul maqsatqa 43,2 mlrd teńge baǵyttaldy. Bul 11 myńnan astam shaǵyn nesie berýge múmkindik berdi. Onyń 60 paiyzyn startap-jobalar quraidy. Baǵdarlamany iske asyrý aýylda 11 myń turaqty jumys ornyn qurýǵa múmkindik berdi. Aldaǵy bes jylda 250 mlrd teńge somasyna 50 myń shaǵyn nesie berý josparlanyp otyr», - dedi agroónerkásiptik keshendi damytýdyń negizgi baǵyttary jáne investitsiialyq jobalardyń iske asyrylýy týraly baiandaǵan Saparhan Omarov.
Onyń aitýynsha, eńbek ónimdiligin arttyrý maqsatynda agroónerkásiptik keshendi memlekettik qoldaýdyń tiimdiligin qamtamasyz etý boiynsha jumys júrgizilip jatyr.
«Bul úshin ótken jyly ministrlik sýbsidiialaý tetikterin qaita qaraidy. Olar belgili bir salaǵa basa nazar aýdarmai, biryńǵai tásildemeni kózdeitin boldy. Sondai-aq shaǵyn jáne orta fermerlerdiń sýbsidiialaýǵa qol jetkizýi shekteri ózgertildi», - dedi ol.
