Biyl 492 aýylda 914 jobany iske asyrýǵa 100 mlrd teńge bólindi. Bul týraly Májilistegi Úkimet saǵatynda «Aýyl - El besigi» jobasyn talqylaý kezinde Ulttyq ekonomika ministri Álibek Qýantyrov málim etti, dep habarlaidy QazAqparat.
«2022 jyly damý áleýeti bar 492 aýylda 914 jobany iske asyrýǵa 100 mlrd teńge bólindi. Bul qarajat turǵyn úi-kommýnaldyq sharýashylyq salasynda 95 jobany, 313 áleýmettik infraqurylymdy, onyń ishinde 123 bilim berý jobasyn, 51 densaýlyq, 62 mádeniet jáne 77 sport jobasyn iske asyrýǵa múmkindik beredi. Sonymen qatar, 506 kólik infraqurylymy jobasy júrgiziletin bolady», - dedi Á. Qýantyrov.
Onyń aitýynsha, Memleket basshysynyń tapsyrmasyna sáikes, «Aýyl – El besigi» batys jáne ońtústik oblystarǵa halyqty áleýmettik-mádeni, sport jáne bilim berý infraqurylymyn damytý úshin 20 mlrd teńge kóleminde qarajat bólý josparlanýda. Bólinetin qarajat aiasynda mektepter, aýrýhanalar, mádeniet úileri, sport nysandaryn salý, qaita jańǵyrtý jáne jóndeý boiynsha jobalar tańdaldy.
«Ózderińizge belgili, qarajat bólý máselesi 2022 jylǵa arnalǵan respýblikalyq biýdjetti naqtylaý aiasynda Parlamentte qaralyp jatyr. Infraqurylymdyq damý jónindegi is-sharalardy iske asyrý Óńirlik standarttar júiesine sáikes júzege asyrylatyn bolady. Qazirgi ýaqytta, Óńirlik standarttarda aýyldar úshin 12 kórsetkish (obektiler/qyzmetter) qarastyrylǵan, aýyldyq okrýg ortalyqtaryna - 24, aýdan ortalyqtaryna – 32.
2021 jyldyń qorytyndysy boiynsha óńirlik normativterge sáikes, aýyldardy standarttardyń ortasha qamtamasyz etý 64,1%-dy qurady. Onyń eń joǵary kórsetkishi Atyraý, Mańǵystaý, Qostanai, Soltústik Qazaqstan oblystarynda baiqaldy. Tómen kórsetkishter Qyzylorda, BQO, Almaty oblysynda baiqalady», - dedi ministr.
Onyń sózine qaraǵanda, jalpy jobany júzege asyrýdyń úsh jyly ishinde 206 mlrd teńge bólindi.
«Aldaǵy 4 jylda aýyldy eldi mekenderdiń infraqurylymdyq máselelerin sheshýge taǵy 670 mlrd teńge qajet etedi. Bul 3,5 myńnan astam aýyldaǵy 7 mln aýyl turǵynynyń ómir súrý deńgeiin jaqsartýǵa múmkindik beredi», - dedi Á. Qýantyrov.
