Aqtóbelik qala men aýdanǵa qatar qujat tapsyryp, eki mekenjaidan aqsha alyp otyrǵan, dep habarlaidy "Ult aqparat".
Aqtóbede birinshi sáýirge deiin 14,5 myń otbasy áleýmettik kómek aldy. Oǵan biýdjetten 266,7 million teńge jumsaldy. Al ataýly áleýmettik kómek engizilgeli 18,7 myń januia kómek alyp, qazirgi kezge deiin olarǵa 8,9 milliard teńge tólendi.
«Arasynda alaiaqtyq ister de kezdesedi. Azamattar tabysyn jasyryp, qujattardy ózgertip, kómek alǵanyn ashyq aitqymyz keledi. Olar jaǵdaiy tómen otbasy qataryna jatpaidy. Qazirgi kezde 3488 otbasyna kómek berý toqtatyldy. Olardyń naqty kirisi men tabysy jasyrylǵan. Sonyń ishinde 1227 otbasynyń 1199-yna tólem múlde toqtatyldy. 1800 otbasyna qaita esepteý júrgizilip jatyr. Al 144 januiadan 13,2 million teńge qaitaryldy. Máselen, azamat Q.-ǵa 12 aiǵa 1,5 million teńge esepteldi. Ol qujatty 21 sáýirde Alǵa qalasynda tapsyrady. Keiin 23 sáýirde Aqtóbe qalasyna ýaqytsha tirkeýge turyp, qaita qujatyn berip, AÁK alǵan. Alǵan 400 myń teńgeni memleketke keri qaitardy. Alǵashqy kezde mundai qatelik ketkeni ras. Sonymen qatar kóptegen azamat jumys berýshimen kelisip, jalaqysyn azaityp alǵan. Qazir Memlekettik kirister departamenti bul jaitty baqylaýǵa aldy», - dedi oblys ákiminiń orynbasary Marat Toqjanov.
Aita keteiik, Aqtóbede AÁK-tiń úsh ailyq aqshasyn birjolǵy tólemmen alyp, kásip bastaǵan adamdar da bar. Sonymen qatar 200 AEK kóleminde grant alǵan otbasylar kóbeidi.
«Áiteke bi aýdanynyń Áike aýylynan sulýlyq salony ashyldy. Shalqar, Yrǵyz aýdanynda mal basyn kóbeitti, Temir, Muǵaljar aýdanynda qus sharýashylyǵyn keńeitti», - dedi oblystyq Jumyspen qamtýdy úilestirý jáne áleýmettik baǵdarlamalar basqarmasynyń basshysy Aqsulý Jubanazarova.
Aita keteiik, Aqtóbe oblysy boiynsha 19 687 oqýshy tegin ystyq tamaqpen qamtyldy. Onyń 12 943-i ataýly áleýmettik kómek alýshy. Kópbalalardyń úlesi basym. Qazirgi ýaqytta AÁK zańsyz alǵandarǵa aqshany keri qaitarý jóninde habarlama berildi. Bir aida qaitarmasa, memlekettik organ sotqa júginedi.
Eske salaiyq, QR Eńbek jáne halyqty áleýmettik qorǵaý ministri Birjan Nurymbetov AÁK tóleýdiń jańa ádisteri engiziletinin atap ótken bolatyn.
