© AP Photo / Jean-Francois Badias
Qostanai oblysynda sot alaiaqtarǵa kómektesken eki stýdentten 18 mln teńgeni óndirip alýǵa úkim shyǵardy, dep habarlaidy Ult.kz Joǵarǵy sotqa silteme jasap.
Resmi málimetke sáikes, búginde alaiaqtyń jeke basy anyqtalmaǵan jaǵdaida jábirlenýshiler dropper, iaǵni, alaiaqtarǵa óz bank kartasyn usynatyn adamdardan barlyq shyǵyndy óndirip alýdy suraidy. Ondai talap-aryzdardyń sany ósti.
Máselen, Qostanai oblysyndaǵy Qarabalyq aýdandyq soty 19 jastaǵy eki dropper-stýdentke qatysty shaǵymdy qarady. Talap qoiýshy olardyń árqaisysynan 9 mln teńgeden astam somany óndirip alýdy talap etti.
Sotta stýdenttiń bireýi negizsiz baiýdy oilamaǵanyn, al ózi alǵan 9 mln teńgeden astam aqshany alaiaq kórsetken esepshottarǵa jibergenin aitty. Ekinshi stýdent óziniń esepshottary arqyly banktik operatsiia júrgizilgenin múldem bilmedim dep málimdedi.
"Biraq banktiń mobildi qosymshasy onyń biometriialyq rastamasy arqyly jáne onyń nómirine jiberilgen SMS/PUSH-qaýipsizdik kodtaryn engizý arqyly tirkelgen. Talap qoiýshy stýdenttermen tanys emes, olarmen mámile jasamaǵan, olardyń aldynda mindettemeleri bolmaǵan jáne qaiyrymdylyqpen ainalyspaǵan. Osylaisha, eki stýdent talap qoiýshynyń esebinen negizsiz baiýǵa tyrysqan", - deidi sot mamandary.
Sýdia shyǵynǵa batqan áieldiń eki talabyn da qanaǵattandyrdy. Stýdentterdiń árbireýi 9 mln teńgeden qaitaryp berýi kerek. Sot úkimi zańdy kúshine engen joq.
Sol siiaqty Qyzylorda qalasynyń 60 jastaǵy turǵyny da sotqa aryz túsirgen. Alaiaqtar onyń atyna 4,8 mln teńgeniń nesiesin zańsyz rásimdegen. Sosyn aqshany basqa adamdardyń esepshotyna aýdaryp alypty. Zeinetker áiel solardyń bireýinen 2 mln teńge óndirip alýdy surady.
Dropperdiń ózi sotta Telegram-da qosymsha tabys tapqanyn aitty. Ol úshin bankte esepshot ashyp, alaiaqtardyń nusqaýymen aqshany úshinshi tulǵalarǵa aýdarý qajet bolǵan. Ár tranzaktsiia úshin 5 myń teńge alǵan. Sýdia ony negizsiz baiýǵa áreket jasady degen sheshimge keldi. Sondyqtan zeinetkerdiń paidasyna 2 mln teńge óndirip alýǵa úkim shyǵardy.
