Úleskerlerdi aldaǵan alaiaqtar túrmede otyrýy tiis. Bul týraly Nur-Sultan qalasynyń ákimdiginde ótip jatqan elordany odan ary damytý máseleleri jónindegi májiliste Memleket basshysy Qasym-Jomart Toqaev aitty, dep habarlaidy QazAqparat tilshisi.
«Kelesi problema – elordada turǵyn úidi paidalanýǵa berý qarqyny men qurylys jumystary kóleminiń quldyraýy baiqalady», - degen Memleket basshysy QR Indýstriia jáne infraqurylymdyq damý birinshi vitse-ministri Qaiyrbek Óskenbaevtan osy máselege qatysty jaýap berýin talap etti.
Vitse-ministrdiń aitýynsha, turǵyn úidi paidalanýǵa berýde birneshe problema bar. Máselen, birneshe kópqabatty turǵyn úi salynyp, daiyn turǵanymen qajetti infraqurylymǵa qosylmaǵan.
«Elordamyz Nur-Sultan qalasynda turǵyn úilerdi salyp, paidalanýǵa berý - búgingi kúnniń óte ózekti máselesi. Bul – asa ótkir áleýmettik problema. Osy turǵyda qarastyrý qajet. Kóptegen túsinik berýge bolady. Biraq jasańdar!»,- dep eskertti Qazaqstan Prezidenti.
Osydan keiin Memleket basshysy qala ákimi Altai Kólginovke turǵyn úidi paidalanýǵa berý qarqyny men qurylys jumystary kólemin arttyrýdy tapsyrdy.
«Úleskerlik máselesi de jedel sheshýdi qajet etip otyr. Qalada 49 problemalyq nysan qalyp otyr. Olardyń qurylysynyń aiaqtalýyn 13 500 úlesker kútýde. Bul problemany sheshýge 2018-2019 jyldary 40 mlrd teńge bólindi. Biraq, nebári 4,5 mlrd teńgesi ǵana igerilgen. Buǵan qosa, ákimdik qosymsha 170 mlrd teńge suraidy», - dedi Memleket basshysy.
Al osy máselege qatysty túsinikteme bergen qala basshysynyń aitýynsha, árbir problemaly nysanǵa qatysty jol kartasy ázirlengen.
«Olarda jobalyq-smetalyq qujattarynyń bolmaýy siiaqty problema boldy. Kóptegen alaiaqtar turǵyndardy aldaǵan. Qazir olar túrmede otyr jáne zańǵa sáikes jaýapkershilikteri bar. Olar qujattaryn joǵaltyp alǵan nemese bermegen. Sondyqtan búkil jaz boiy qujattaryn ázirleýmen ainalystyq, qarjy institýttarymen, ekinshi deńgeili banktermen, ortalyq memlekettik organdarmen jumys istedik. Árqaisysy boiynsha naqty josparymyz bar. Biz sizdiń tapsyrmańyzdy oryndaimyz», - dedi Altai Kólginov Qazaqstan Prezidentine qarata.
Osy oraida Memleket basshysy QR Bas prokýratýrasy men Ishki ister ministrligine bul máselemen naqty ainalysýdy tapsyrdy.
«Alaiaqtar túrmede otyrýy tiis. Óitkeni, olar ózderiniń is-áreketterimen azamattarymyzdyń negiz quraýshy quqyqtaryna qastandyq jasap otyr. Azamattarymyzdy aldap, olardy dalada qaldyrady. Mundai jaǵdaida memleket te aralaspai qalmaýy kerek. Áreket etińder de, baiandańdar!», - dedi Qasym-Jomart Toqaev.
