QR IIM Kriminaldyq politsiia departamenti bastyǵynyń orynbasary Qanat Nurmaǵambetov zańsyz onlain nesieler qalai rásimdeletinin aitty, dep habarlaidy QazAqparat.
«Internet alaiaqtardy anyqtaý boiynsha biylǵy 9-11 aqpan aralyǵynda «Anti-Fraud» operatsiiasy ótkizildi. Úsh kúnde 300-den astam qylmys tirkelip, buryn jasalǵan 289 alaiaqtyq qylmysy ashyldy. Alaiaqtyqtyq kóp taraǵan túri – ol internet alańdarda taýar satý nemese qyzmet kórsetýge bailanysty. Olar taýar baǵasyn tómen baǵamen belgileidi, sondai-aq qyzmet kórsetý qunyn tómendetip kórsetedi. Alaiaqtar taýar satyp alýshylarǵa bóten adamnyń atyna rásimdelgen shottarǵa tólemdi tolyqtai nemese ishinara jasaýdy suraidy», - dedi Q. Nurmaǵambetov onlain rejimdegi brifingide.
Onyń aitýynsha, mikronesielik uiymdarda onlain qaryzdardy zańsyz rásimdeý jiilep ketti. Qylmyskerler internet arqyly azamattardyń jeke málimetterin alýǵa tyrysady.
«Shymkent qalasynyń turǵyny áleýmettik jelilerde tabylǵan jeke qujattar týraly habarlandyrýlardy izdegen. Jeke kýálik fotosýretterinen tiisti málimetterdi alǵannan keiin, túrli oblystar turǵyndarynyń atyna 50-ge tarta onlain nesie rásimdegen», - dedi Kriminaldyq politsiia departamentiniń ókili.
Sonymen qatar ol bank kartalary men depozitterdegi qarjyny zańsyz iemdený úshin jeke málimetterdi alýdyń basqa da tásilderi tirkelip jatqanyn aitty.
