Memleket basshysy Qasym-Jomart Toqaevtyń Almaty oblysyna jumys sapary Alataý qalasynyń damý josparymen tanysýdan bastaldy. Bul týraly Aqordanyń baspasóz qyzmeti habarlady, dep habarlaidy ult.kz.
Qazirgi tańda Alataý qalasynyń aýmaǵy 88 myń gektardy quraidy. Shahardy 2050 jylǵa deiin kezeń-kezeńimen damytý kózdelgen. Osy maqsatta qala tórt arnaiy aimaqqa bólinip, negizgi damý baǵyttary men ekonomikalyq ósim kózderi aiqyndalýda. Sondai-aq magistraldy infraqurylymdy damytýǵa arnalǵan jol kartasy ázirlengen.
Qalada basqarýdyń jańa modelin engizýge baǵyttalǵan Konstitýtsiialyq zań qabyldandy.
Búginde Gate City turǵyn úi aýdany qarqyndy damyp keledi. Munda «Jaily mektep» ulttyq jobasy aiasynda bilim berý nysany salynyp, «Mareven Fýd», «KNAÝF», Fruit Art, Dolce Pharm jáne Almaty jeldetkish zaýyty siiaqty iri kásiporyndar jumys istep tur.
Alataýda jalpy quny 2 trillion teńgeden asatyn 53 investitsiialyq jobadan turatyn pýl qalyptastyrylǵan.
Iri jobalardyń qatarynda PepsiCo kompaniiasynyń Ortalyq Aziiadaǵy eń iri kartop óńdeý zaýyty, Mars Petcare kompaniiasynyń úi janýarlaryna arnalǵan azyq óndiretin óńirdegi alǵashqy zamanaýi óndirisi jáne KHAN TENGRI BIOPHARMA kompaniiasynyń farmatsevtikalyq ónimder men meditsinalyq jabdyqtar shyǵarý jobasy bar. Sonymen qatar «Istkomtrans» pen G-Trans kompaniialary logistikalyq klaster qalyptastyrý jumystaryn júrgizip jatyr.
Sapar barysynda Prezidentke Alataýda salynatyn kópfýnktsionaldy Iconic Complex kesheniniń jobasy tanystyryldy. Zamanaýi nysan Gate District aýdanynda boi kótermek jáne qalanyń basty sáýlettik ortalyqtarynyń birine ainalýy josparlanyp otyr.
