QR Ulttyq mýzeiiniń direktory Arystanbek Muhamediuly Alasha hanǵa qatysty sheteldik ǵalymdardyń aralasýymen iri zertteý jumystary bastalatynyn málimdedi. Bul týraly ol Qasqa Jol Youtube arnasyna bergen suhbatynda aitty, dep habarlaidy "Ult aqparat".
«Alasha hannyń ultyna qatysty kóptegen pikirtalas bar. Namysqa tiedi. Ekskýrsovodtar ony «Ózbektiń bileýshisiniń balasy, ústi ala-ala bolǵasyn úiinen shyǵaryp tastaǵan. Sosyn Qazaq jerine kelip, úlken bilikke jetti» dep túsindirip júr. Ekinshi bireýler boiy alasa bolǵasyn «Alasa han» dep, keiin Alasha atalyp ketken dep jatady. Sonda biz ony qazaqtyń batyry, hany dep maqtanarlyq derekter almaimyz ba?», - dedi Arystanbek Muhamediuly.
Eks-ministr Ulytaý jerindegi Alasha han kesenesine mamandardy jinap, onyń tegine qatysty halyqaralyq zertteý jumystaryn bastamaq.
«Sol sebepti qazir Alasha han jaily úlken derekterdi jinap jatyrmyz. Mamyr aiynda mazaryna baryp, arnaiy videomaterialdar túsirip, úsh tilde taratamyz. Álem ǵalymdaryna úndeý jasaimyz. Osydan keiin shetel mamandary kelip, zertteidi. Sonda qazaqtyń tarihy múldem basqasha bolady», - deidi Arystanbek Muhamediuly.
Aita keteiik, qazaq jerinde bilik qurǵan Alasha hannyń shyqqan tegi men esimine bailanysty túrli derekter men ańyz áńgimeler bar. Kóbine «Alash» etnoniminiń shyǵýy Alasha han atymen bailanystyrylady. Eger zertteýler arqyly dáiekti málimetter shyqsa, Qazaq memleketiniń qalyptasý tarihy men merziminde ózgerister bolýy ǵajap emes. Kei ǵalymdar Alasha han kesenesinde jatqan Shyńǵys han ekenin de alǵa tartady.
«Nelikten Ámir Temir úlken joryqqa shyǵar aldynda Ulytaýǵa kelip, tasqa qashap «Men áskerimmen Altyn Ordany qiratýǵa bara jatyrmyn. Sol úshin Ulytaýǵa keldim» dep jazyp ketken? Sebebi Ulytaý qasietti jer. Sol jazý qashalǵan tas Ermitajdyń eń bir ádemi jerinde tur. Halyqaralyq ǵalymdar osy máseleni de zertteýi qajet», - deidi Ulttyq mýzei direktory.
