QR Ishki ister ministrliginiń murajaiynda «Tarixqa taǵylym - ótkenge taǵzym» taqyrybynda kórme ashyldy. Alaida oǵan syrttan kez kelgen adam kire almaidy. Sebebi kórmege qupiia qujattar da shyǵarylyp otyr, dep habarlaidy QazAqparat tilshisi.
Qupiia qujattardyń barlyǵy - qylmystyq ister. Sonyń ishinde repressiiaǵa ushyraǵandar, aqtalǵandar, aqtaýǵa jatpaityndar, áskeri tutqyn bolǵandar men Qazaqstanǵa jer aýdarǵandardyń materialdary bar. Al Sáken Seifýllin, Axmet Baitursynov, Oraz Jandosov pen Beimbet Mailin syndy Alash arystarynyń qylmystyq isterin bólek stendten kórýge bolady. Axmet Baitursynovtyń jeke papkisimen birge óz qolymen jazǵan dáiekter de bar. Árbir papkige Alash arystarynyń ómirbaiany jazylǵan qaǵazdy qystyryp qoidy. Basqa málimetterdiń bári - qupiia. Papkilerdi qolmen ustaýǵa ruqsat joq. Ishin ashyp qaraýǵa da bolmaidy.
«Bul joly biz tanystyrýǵa bolady degen paraqtardy kórsetip otyrmyz. Al qylmystyq isterdiń ishinde kýágerler, tergeý materialdary jáne taǵy basqa málimetter bar. Ol jerde adamdardyń familiialary da kórsetilgen. Sol sebepti ondai málimetterdi kórsetýge bolmaidy. Negizi, búginde biz respýblika boiynsha skanerlerdi satyp alyp jatyrmyz. Óitkeni bizdiń muraǵatymyzda jatqan materialdardyń barlyǵy qaǵaz nusqasynda saqtalǵan. Sol sebepti ishki ister organdarynyń muraǵatynda jatqan qylmystyq isterdi elektrondy nusqaǵa kóshirýimiz kerek. Al búgingi kórmege shyǵarylǵan qupiia qujattardy skanerden ótkizý úshin aldymen ruqsat alýymyz qajet. Ondai ruqsat áli joq», - dedi QR IIM Arnaiy memlekettik muraǵatynyń bas mamany Dariia Áliqyzy.
Onyń aitýynsha, ishki ister organdarynyń arnaiy memlekettik muraǵattarynda Alash partiiasyna qatysty 138 qylmystyq is bar.
Jalpy, respýblika boiynsha saiasi qýǵyn-súrginge ushyraǵandarǵa qatysty qylmystyq isterdiń sany 140 myńnan asady. Sonyń ishinde 14 myńǵa jýyǵy - aqtalmaǵandardyń materialdary. Qylmystyq isterdiń basym bóligi Almaty qalasy, Qaraǵandy men Shyǵys Qazaqstan oblystarynyń politsiia departamentterinde saqtalǵan.
Ortalyq apparatta ashylǵan kórmege kez kelgen adam kire almaidy. Qupiia qujattardy kórý úshin ministrdiń atyna, ia bolmasa, kadrlyq qyzmetke resmi xat jazý kerek. Sodan keiin ujymmen kelip, kórmeni aralap kórýge bolady.
«Bul kórme Ishki ister ministrliginde alǵash ret uiymdastyrylyp otyr. Negizi, respýblika boiynsha arnaiy memlekettik muraǵattarda jyl saiyn 31 mamyr - saiasi qýǵyn-súrgin qurbandaryn eske alý kúnine orai kórmeler ótip turady. Biyl biz osy kórmeni ortalyq apparatta uiymdastyrýdy jón kórdik. Qalalyq mektep oqýshylary, kolledj ben joǵary oqý oryndary stýdentteri, jalpy, tarixqa qyzyǵýshylyǵy bar adamdar kelip, kórmege shyǵarylǵan qujattardy kóre alady. Biraq aldymen resmi xat jazyp, ruqsat alý qajet», - deidi ministrlik mamandary.
Kórme mamyrdyń 31-ine deiin jalǵasady.
