Kesheli beri áleýmettik jelilerde qyzyl jalynmen 2 kún boiy damylsyz kúresken órt sóndirýshilerdiń ábden qaljyryp, uiqyǵa bas qoiǵan videosy tarap jatyr. Jurttyń júregin eljiretken osy videodaǵylardyń biri – №14 órt sóndirý bólimshesi bastyǵynyń orynbasary Ulan Nurmuhambet. QazAqparat tilshisi azamattyq qorǵanys aǵa leitenantymen suhbattasyp, talaidy tyǵyryqqa tiregen tilsiz jaýmen qalai kúreskenderin surap kórdi.
- Qutqarýshylardyń qataryn tolyqtyrǵanyńyzǵa qansha jyldyń júzi boldy?
- 1990 jyly 10 aqpan kúni Shyǵys Qazaqstan oblysy Katonqaraǵai aýdany Topqaiyń aýylynda jaryq dúnie esigin ashtym. 2012 jyly Otan aldyndaǵy boryshymdy elordadaǵy 36-shy desanttyq-shabýyl brigadasynda ótedim. Áskerden kelgennen keiin Ridder qalasyndaǵy №1 mamandandyrylǵan órt sóndirý bólimine jumysqa ornalastym. Bul 2013 jyldyń qańtar aiy bolatyn. 4 jarym jyldai órt sóndirýshi bolyp ter tókkennen keiin Aqtóbe qalasynda 3 ailyq ofitserlik kýrsqa baryp bilim aldyq. Osydan keiin qaraýyl bastyǵy bolyp, keiinnen bólim bastyǵynyń orynbasary qyzmetine taǵaiyndaldym. Qazirgi ýaqytta №14 órt sóndirý bólimi bastyǵynyń orynbasary bolyp eńbek etip kelemiz.
- Ormanda shyǵyp, jer úilerge taraǵan alapat órtpen qalai kúreskenderińizdi aityp berseńiz.
- Órt 10 mamyr kúni tús kezinde Ridder orman sharýashylyǵynda shyqty. Negizinen bul №1 mamandandyrylǵan órt sóndirý bólimine qarasty aýmaq. Sol bólimniń qutqarýshylary tilsiz jaýdyń betin qaitara almaǵandyqtan bizden kómek surady. Saǵat 14.30 shamasy. Bólimdegi jigitter kólikke minip, shuǵyl attandy. 15.00-ge qarai ózim de oqiǵa ornyna jettim. Ol kezde jalyn jer úilerge tarap ketken. Sosnovyi bor kóshesindegi otqa oranǵan 4 úidi kórdim. Jel soǵyp tur. Ainalany túgel tútin tumshalap alǵan. Esikterdi qaǵyp halyqqa «Syrtqa shyǵyńdar! Órt kele jatyr!» dep aiqailadyq. Jigitterge «jalyndy kósheniń sol jaǵyna shyǵarmańdar» dep tapsyrma berdim. Órtti ustap turý qiynǵa soqsa da bul mindet sátti oryndaldy.
Kenet turǵyndardyń biri «Úiden shyqpaimyn! Garajda júk kóligim tur. Onsyz eshqaida da barmaimyn» dedi. Al túsindirip kór! Qansha aitsaq ta tyńdar emes. Sodan soń kólikti qaýipsiz jerge alyp shyqtyq. Órtpen kúres bir sátke de toqtamady. Úilerden 10-ǵa jýyq gaz ballonyn syrtqa shyǵaryp úlgerdik. Qutqarýshylardyń kiimderi janyp, kaskalary balqyp, bir birine sý shashty. Birazdan soń Óskemen qalasynan qosymsha kúsh kelip jetti. «Kaztsink», «Vodokanal» mekemeleriniń sý tasýshy kólikteri de jumyldyryldy.
- Osyndai syn saǵatta eń áýeli ne oiladyńyz?
- Shynymdy aitsam, oilanýǵa ýaqyt bolmady. Tek áreket. Tilsiz jaýmen teketireste ár sekýndtyń mańyzy zor. Órttiń órshýi – qas-qaǵymda. Ákem orman sharýashylyǵynda ormanshy bolyp jumys isteidi. Keiinnen jalynnyń beti qaita bastaǵan kezde eń áýeli «ákem aman-esen be eken, birdeńe bolyp qalmasa igi edi» degen oi sanamda sarnap qoia berdi.
- Kúndiz-túni órtpen kúreskende múlde nár tatpadyńyzdar ma?
- Úiler otqa oranyp jatqanda as iship otyrmaisyń ǵoi. Arasynda tamaǵymyzdy jibitý úshin sý urttap qoiamyz. Tún jarymynda da esh toqtaýsyz órtti óshirýmen boldyq. Tek kelesi kúni túske qarai jalyndy jeńip bolǵan soń jergilikti atqarýshy organ qyzmetkerleri men volonterler ákelgen tamaqtan dám tattyq. Ábden qaljyrap, qol-aiaǵymyz syzdap tur. Bir jaǵynan uiqy da qysyp barady. Sóitip, 20 minýttai myzǵyp aldyq. Mine, osy kezde bizdi videoǵa túsirip alyp, jelige júktep jiberipti. Ony artynan estidik. Kim túsirgenin bilmeimin. El-jurttyń rizashylyqtaryn bildirip, alǵystaryn jaýdyryp jatqanyn kórgende keýdemizdi qýanysh kernep, bul salaǵa beker kelmegenimizdi túsingendeimiz.
- Otbasyńyz jaily aityp ótseńiz?
- Áielim, eki balam bar. Qudai qosqan qosaǵym Aidana Ridderdegi №1 mamandandyrylǵan órt sóndirý bóliminde feldsher bolyp jumys isteidi. Ulym Islam 4 jasta, al qyzym Asylym 2-ge toldy.
- Ulyńyz óskende órt sóndirýshi bolǵysy keletindigin aitsa qoldar ma edińiz?
- Árine, qoldaimyn. Adam ómirin alǵash qutqarǵan kezde erekshe sezimde bolady ekensiń. Buny sózben aityp jetkizý múmkin emes. Osy ómirge bosqa kelmegenińdi sezip, óz ornyńdy tapqanyńdy túisinesiń. Balamnyń mańdaiyna da sol bir ekiniń birine buiyrtpaityn erekshe áserge bólenýdi jazsa qalai qarsy bolaiyn? Oǵan árkez aqylymdy aityp, qoldaý kórsetýge ázirmin.
- Áńgimeńizge kóp rahmet!
