Foto: DPA/TASS
Túrkiianyń Alaniia aýmaǵynda bolǵan jol apatynan qazaqstandyq týrist kóz jumdy. Bul aqparatty QR Syrtqy ister ministrliginiń baspasóz qyzmeti rastady, dep habarlaidy QazAqparat.
«Alaniiadaǵy apattan zardap shekken jolaýshylardyń biri aýyr jaraqat saldarynan búgin tańerteń aýrýhanada qaitys boldy. Qaza tapqan QR azamatynyń uly búgin Antaliiaǵa keldi jáne qazir bizdiń diplomattarmen birge. Oǵan búkil qajetti kómek kórsetiledi», - delingen vedomstvo habarlamasynda.
Eske salaiyq, túrkiialyq BAQ-tyń habarlaýynsha, qazaqstandyq týristerdi tasymaldaǵan mikroavtobýs Alaniiadaǵy Okurcalar Mahallesi D-400 trassasynda júk kóligine soǵylǵan. Saldarynan kólik júrgizýshi men gid (Ýkraina azamaty) oqiǵa ornynda kóz jumdy.
Apat ornyna politsiia men meditsina brigadalary dereý jiberilgen. Kólikte bolǵan 12 týristiń altaýy aýyr jaraqatpen jergilikti aýrýhanaǵa jetkizilgen.
Sondai-aq búgin jol apatynan eki qazaqstandyq jaraqat alǵany, olarǵa ota jasalǵany habarlandy.
