Belgili aitysker aqyn Muhamedjan Tazabek ózin synaǵandarǵa jaýap berdi, dep habarlaidy Sputnik Qazaqstan.
"Qazaqstanda eshkim ashtan ólmeidi. Qazaqstanda aýzy qimyldaǵannyń qoly qimyldaidy, qoly qimyldaǵannyń aýzy qimyldaidy. Alańǵa kelgen adamdardyń 50%-yn "jertvo" qylyp shyǵaryp jatyr. Siz "prikazben" keldińiz be? Memleket úshin sharýańyzdy jasańyz". Bul aqyn Tazabektiń jýyrda politseilermen kezdesýinde sóilegen sózinen úzindi.
Tazabektiń osy ýaǵyzy jelide tarap, biraz adamnyń ashýyn týǵyzǵan edi. Kesheli beri jeli qoldanýshylary aqyndy synǵa alyp, sógip jatyr. Búgin Muhamedjan Tazabek instagram paraqshasynda synap-minegenderge óz jaýabyn berdi.
"Janashyrlaryma" úlken "rahmet" aitqym keledi. Búkil kezdesýime baryp, videolarymdy jinap, minsiz montaj jasap, qai kúni qansha adamǵa nasihat aitqanyma deiin táptishtep, erekshe eńbek jasaǵan ekensizder... Basyn aiaǵyna, aiaǵyn basyna japsyryp, bir sóilemdi ekige bólip turyp montajdap, airyqsha maitalmandyq tanytqan ekensizder...Sonshama kezdesýde, munshama "qatygez, el buzarlyq, eki júzdi" sózder aitqan bolsam, kózbe-kóz estip otyrǵan birde-bir tyńdarmannyń áleýmettik jelide qarsy pikir bildirmegeni qalai? Kerisinshe júzdesýden ulttyq rýhy qairalyp, rizashylyqtan aq batasyn jaýdyrǵan myńdaǵan aǵaiynnyń aq tilegi aldamshy alǵystar ma edi?!", - dep jazǵan ol.
Aqyn tolyq video bar bolsa, ata men ájeniń, ana men balanyń qadyr-qasietin aityp, pagondylardyń keibiri kózine jas alǵanyn nege kórsetpedińizder dep suraidy.
"Qataiǵan júrekter men turpaiy minezderdiń aiyptalǵanyn, "birinshi kezekte tártip pen talapty ózderińen bastaý kerek" degenimdi nege kesip tastadyńyzdar eken? "Búlik kisi óltirgennen jaman, ol qaterli jol" onyń qaterliligi jaily "álemniń barlyq ǵalymy kelisken, pátýa bergen" dep aitqanymdy nege ajyrattyńyzdar. Sońǵy sózdi Mekkedegi jambastan tebetin politsiia jaily áńgimeniń artyna nege japsyrdyńyzdar? Qytaidyń álem qaýiptenip otyrǵan tustary men odan aman qalýdyń joldary jaily aitqan jarty saǵattyq tolǵanysymdy nege tolyq bermedińizder? "Qytaidan qoryqpaiyq, Qudaidan qorqaiyq" degen alǵashqy sóilemdi ǵana nege oiyp aldyńyzdar?", - deidi Tazabek.
Osy oraida ol rolikti jasaǵan nemese sol jiyndarǵa qatysqan tyńdarmandaryna ótinishin bildirgen.
"Kezdesýler kásibi kameraǵa túsirilgen eken. Onyń ústine árkimniń qaltasynda smartfon júr ǵoi. Eshbir jerde eshkimge túsirýge tyiym salǵanym joq. Quqyq qorǵaýshylarǵa qarata, "halyqty aiamańdar, uryńdar, soǵyńdar, olar búlikshiler, aiaǵyn syndyryńdar, ata-ájeni julmalańdar, áielder men bala-shaǵany shyńǵyrtyńdar" degen eki minýttyq, tym bolmasa montajdalmaǵan bir minýttyq videony jurtqa jariialańyzdarshy. Bolmasa, qytaidy jaqtaǵan, onyń dańqyn aspandatqan 2 minýttyq montajdalmaǵan videony maǵan taýyp berińizdershi. Taýyp bergen kisige astymdaǵy atymdy túsip berýge daiynmyn", - deidi Tazabek.
Ol eldegi kemshilikterdi biletinin aitty.
"Bilgendikten sapamyzdy arttyryp, synǵandy bútindeý úshin kúndiz-tún shapqylap júrmiz. Alańǵa shyǵý da qazaqqa qol emes. Eýropalyqtardai alańǵa tórtte kelip, altyda qaityp ketetin qazaqty ázir kórgenim joq. Shaqyrǵan toidyń ózine keshigip baryp, úi iesiniń uiqysy kelgende biraq qaitatyn qaýymbyz. Shaidan soń soń shai ishetinimiz taǵy bar. Sherý – bizdiń mentalitetke shetin. Qazaqtan alańdy qyzǵanbaimyn. Arandap qalamyz ba, dep alańdaimyn. Bále aiaq astynda. Nietińiz beibit sherý shyǵar... "Jetiskennen shyǵam ba" dersiz... Emotsionaldy ortaǵa kelgesin eshkimge garantiia joq. Ot jaǵý op ońai", - dep túiindegen sózin aqyn.
