Almaty oblysy ákiminiń orynbasary Serikjan Beskempirov káriz qubyryn tartý boiynsha jobalyq-smetalyq qujat daiyn ekenin málim etti, – dep habarlaidy «Ult aqparat».
Almaty oblysy ákiminiń orynbasary Serikjan Beskempirovtiń aitýynsha, qazirgi ýaqytta Alakól jaǵasyndaǵy Aqshi aýylyna káriz júiesin tartý boiynsha jobalyq-smetalyq qujat daiyn ekenin jetkizdi.
«Kelesi jyldan bastap qurylys-montajdaý jumystary bastalady. Qazir de jergilikti káriz sýy jelileri bar. Jalpy, osy ýaqytqa deiin ol jerdiń infraqurylymy aitarlyqtai júrgizildi. Alakóldiń týristik tartymdylyǵyn arttyrý úshin Aqshi aýylyna baratyn jol jóndelip, jaryq tartyldy. Meditsinalyq pýnkt salyndy. Káriz sýy júiesin tartý – úlken joba. Kelesi jyldan bastap qolǵa alamyz. Másele oblys ákiminiń baqylaýynda. Problemalyq suraqtar joiylady» dedi ol.
Oblys ákiminiń orynbasary óz sózinde 200 demalys ornynyń bári tekserilgenin, kemshilikter joiylǵanyn málim etti. Óz kezeginde Alakóldegi atalmysh másele jaily senator Muhtar Qul-Muhammed te eskertý jasap, bolashaqta mundai jaǵdaidyń qaitalanbaýy úshin naqty shara qabyldanýy kerektigin atap ótti.
«Jaǵalaýdy tolyǵymen teksergenderińiz durys. Óitkeni, Eýropada Alakólden 5-10 ese kishkene kólderdi alaqanyna salyp, úlken týristik oryndarǵa ainaldyryp otyr. Bul sizderge sabaq bolýy kerek dep oilaimyn» dedi senator.
Aita keteiik, Almaty oblysyndaǵy Alakólge qubyr arqyly lai sý tógilip jatqany buǵan deiin habarlanǵan bolatyn. Aqshi aýylyndaǵy «Kóktem grand» demalys ornynyń basseininen aqqan las sýdyń áleýmettik jelige taraǵan videosy halyqtyń narazylyǵyn týdyrǵan. Búgin bul máseleni sý qaýipsizdigi máselesi talqylanǵan Parlament Senatynyń otyrysynda depýtat Dana Nurjigit qaita kóterdi.
