QR DSM Taýarlar men kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary - QR Bas memlekettik sanitary Jandarbek Bekshin Alakóldegi belgisiz lai sýdyń qaidan kelgenin túsindirdi, dep habarlaidy QazAqparat tilshisi.
Onyń aitýynsha, qaldyq sý káriz júiesinen emes, kól mańyndaǵy saýyqtyrý kesheniniń basseinderinen aqqan.
«Kól mańynda ornalasqan saýyqtyrý kesheninde 2 bassein bar. Onda Alakóldiń shipaly sýyn toltyrady. Sáikesinshe, sýdy jańartyp otyrady. Maǵan arnaiy video kelip tústi, onda 2 basseinniń 2 qubyry anyq kórsetilgen. Iaǵni tereń sý sorǵylary kóldiń sýyn alady jáne eskirgen sýdy qaitadan kólge quiady. Bul - kárizdiń qaldyǵy emes», - dep túsindirdi J. Bekshin Ortalyq kommýnikatsiialar ortalyǵynda tilshilerge bergen suhbatynda.
Sondai-aq, bas sanitar bassein sýyn qalalyq káriz júiesine tógýge bolmaitynyn aitty.
«Basseindegi aýqymdy sý kólemin káriz júiesine aǵyzar bolsa, sý tasyp-tógiler edi. Bassein sýyn tereńge jibergendikten, tunba kóterilip, lai paida bolǵan. Aýmaqtyq tabiǵatty qorǵaý departamentteri demalys oryndaryna sýdy qaitadan kólge tógýge, jańartýǵa ruqsat bergen. Odan esh qaýip joq», - dedi Jandarbek Bekshin.
Esterińizge sala keteiik, Alakólge belgisiz lai sý qubyr arqyly tógilip jatqanyn týrister habarlaǵan bolatyn. Beinejazbadaǵy málimetke sáikes, kólge tógilip jatqan sýdyń jaǵymsyz iisi bar. Artynsha Alakól aýdanynyń ákimdigi bul máselege orai arnaiy komissiia qurylǵanyn jetkizdi.
