Shyǵys Qazaqstan oblysynda Alakólge baratyn týrister úshin temirjol jáne avtobýs reisteriniń sany arttyrylady, dep habarlaidy "Ult aqparat".
1 mamyrdan bastap áýejai ushý-qoný jolaǵyn rekonstrýktsiialaý jumystaryn júrgizý maqsatynda jabylady. Soǵan orai Alakólge baratyn týrister úshin temirjol jáne avtobýs reisteriniń sany birshama kóbeitilmek. Sondai-aq halyq óz kólikterimen yńǵaily jetý úshin jol da jóndelýde. Onlain formatta ótken baspasóz máslihatynda «Qazavtojol» UK ShQO filialy direktorynyń orynbasary Asylbek Nuǵymanov «Óskemen – Qalbataý» tasjolynyń tolyqtai asfalttalǵanyn aitty.
«2017 jyldan bastap «Nurly jol» memlekettik baǵdarlamasy aiasynda «Taldyqorǵan-Qalbataý-Óskemen» tasjolyn rekonstrýktsiialaý jumystary bastalǵan. Shyǵys Qazaqstan aýmaǵyndaǵy joldyń uzyndyǵy 454 shaqyrymdy quraidy. Búgingi tańda joba boiynsha jumystardyń 57 paiyzy aiaqtalǵan. Qalǵan sharalar 2021 jyldyń sońyna deiin máresine jetpek», - dedi ol.
Biyl negizgi jumystar Qalbataýdan Aiagózge jáne odan keiingi Taskeskenge burylar tusqa deiin júrgiziledi. «Taskesken-Baqty» jolyn rekonstrýktsiialaý jumystary shilde aiynda aiaqtalady.
ShQO Jolaýshylar kóligi jáne avtomobil joldary basqarmasynyń basshysy Nurjan Jumadilovtiń aitýynsha, Alakólge baratyn poiyz vagondary kóbeitilse jolaýshylar úshin oryndar sany 352-den 456-ǵa deiin artady.
«17 maýsymnan bastap quramy 10 vagonnan turatyn «Almaty-Dostyq» baǵytyndaǵy poiyz aptasyna úsh ret qatynai bastaidy. Bul qosymsha 450 oryndy qamtamasyz etedi. Óskemen, Semei qalalarynan keletin demalýshylar úshin vagondar sany besten jetige deiin kóbeitiledi. Budan bólek, kúndelikti júretin avtobýstar sany ulǵaia túspek. Naqty aitqanda, eki esege, segizden 16 avtobýsqa artady. Osynyń arqasynda qoǵamdyq kólik arqyly Alakólge jetetin týristter sany 35,7 myńnan 71,4 myń adamǵa deiin kóbeiedi», - dedi ol.
