Shyǵys Qazaqstannyń týrizm salasyndaǵy bul jańalyqpen oblys basshysy Danial Ahmetov bólisti, dep habarlaidy "Ult aqparat".
«Alakól jaǵalaýy búgingi tańda Qazaqstannyń basymdyqqa ie týristik oryndarynyń ondyǵyna kirdi. Sońǵy 3 jylda infraqurylymdy damytýǵa jáne abattandyrýǵa 6,2 mlrd teńge bólindi. Aldaǵy 4 jylda 28 milliard teńgege taǵy 7 iri infraqurylymdyq jobany júzege asyrý josparlanyp otyr. Sol sekildi Resei Federatsiiasynyń Kýrortologiia jáne fizioterapiia ǵylymi-zertteý institýty jyl boiy saýyqtyrý týrizmin damytý úshin kóldiń emdik qasietteri boiynsha zertteý jumystaryn júrgizgen bolatyn. Zertteý nátijeleriniń ózi kólde sanatorii salýǵa bolatynyn kórsetip otyr», - dedi Danial Ahmetov OKQ-da ótken baspasóz máslihatynda.
Aimaq basshysy sonymen birge Alakól jaǵalaýynyń damýy biýdjetke salyq tólemderiniń túsimine yqpal etetinin jetkizdi.
«Byltyrǵymen salystyrǵanda biyl Alakóldiń tabys mólsheri 1,6 ese ósti. Sonymen qatar oblysta meditsinalyq týrizmdi damytýdyń barlyq alǵysharttary jasaldy. Qazirgi ýaqytta Qazaqstanda bes meditsinalyq qyzmet - meditsinalyq týrizmdi damytýda artyqshylyqqa ie bolýy múmkin. Olardyń úsheýi - kardiohirýrgiia, neirohirýrgiia, birlesken protezdeý - Shyǵys Qazaqstan oblysynyń klinikalarynda bar», - dedi ol.
