Foto: Abai oblysynyń ákimdigi
Abai oblysyndaǵy tanymal demalys orny – Alakól jaǵalaýyndaǵy kópshilikke arnalǵan jańa nysandar salynbaq, dep habarlaidy Abai oblysynyń ákimdiginiń baspasóz qyzmeti.
Buǵan deiin turǵyndar tarapynan Alakól jaǵalaýyndaǵy Arbattyń jaǵdaiyna bailanysty syn kóp aitylyp kelgen edi. Oblys ákimdiginiń málimetinshe, qazir Arbat jańartylyp, boiaý, syrlaý jumystary júrgizilip jatyr. Budan bólek jaǵalaýdaǵy eskirgen temir jaqtaýlar da tolyq aýystyryla bastady.
"Biyl jaǵalaýdaǵy 5 shaqyrymǵa jýyq jolǵa asfalt tóseledi. 10 modýldi, 15 biodárethana, 40-tan astam kiim aýystyratyn kabinalar qoiylady. Qoqys jáshikteri men beinebaqylaý kameralarynyń sany artady. Jaǵalaýdy nyǵaitý úshin pirs jáne qalqyma ornatylady", - deidi Maqanshy aýdanynyń ákimi Dáýren Qoigeldin.
Týrister kóp keletin Arbattyń júktemesin azaitý úshin jańa qoǵamdyq keńistik salynady. Munda 100 adamǵa arnalǵan saýda-sattyq oryndary qarastyrylmaq. Atap aitqanda, úlken sahna, sýburqaq salynyp, turǵyndar serýendeitin arnaiy alań bolady.
Qazir jerdi tegisteý, keramikalyq taqtaishalardy tóseý jáne qorshaý ornatý jumystary bastalǵan. Qoǵamdyq keńistik qurylysy 1 shildege deiin aiaqtalady.
"Osydan eki ai buryn Alakólge arnaiy kelip, qajettilikterdi bilip, barlyq máselemen tanysqan bolatynmyn. Halyq kóp keletin týristik aimaqta 2018 jyldan beri jóndeý jumystary júrgizilmegen eken. Osyny eskere otyryp, oblystyq biýdjetten 658 mln teńge qarjy bóldik. Sýǵa túsý maýsymy ashylǵanǵa deiin jumysty sapaly aiaqtaýymyz kerek", - dedi oblys ákimi Berik Ýáli.
Jazǵy demalys maýsymynda Alakól jaǵalaýynda qaýipsizdikti qamtamasyz etý úshin 40 politsiia qyzmetkeri jumyldyrylady. Órt qaýipsizdigin saqtaý maqsatynda Tótenshe jaǵdailar departamentiniń qyzmetkerleri kezekshilikke tartylyp, órt sóndirý kólikteri jumys istemek.
