QR Parlamenti Senatynyń depýtaty Sultan Dúisenbinov Almaty oblysynyń týrizm salasyndaǵy ózekti máselelerdi kóterdi, dep habarlaidy QazAqparat.
Premer-Ministrge joldaǵan saýalynda senator Alakól kóli jaǵalaýynyń injenerlik infraqurylymyn damytýdyń mańyzdylyǵyna toqtaldy. Qoldanystaǵy elektr jelisine túsetin aýyrtpalyq kóp bolǵandyqtan kei jerlerde elektr qýatynyń jetispeýshiligi baiqalady. Alakólde mobildi internetke qol jetkizýde de problemalar bar.
«Týristik obektilerde uialy bailanys operatorlarynyń stantsiialary bolǵanymen, olardyń qýaty búkil Alakól jaǵalaýyn qamti almaidy. Osy oraida, uialy bailanys operatorlary stantsiialarynyń aýqymyn arttyrý, týrizm obektileri úshin jeńildikti baǵalarmen joǵary jyldamdyqta internet jelilerin júrgizý joldaryn qarastyrý kerek», - dedi óziniń depýtattyq saýalynda Sultan Dúisembinov.
Sonymen birge, senator Almaty oblysyndaǵy taý shańǵysy kýrorttaryn sýmen qamtamasyz etýge bailanysty máselelerdi de kóterdi. Ol qosylatyn nysandar men keleshegi zor taý shańǵysy kýrorttarynyń qajettilikteri úshin sý resýrstaryna gidrogeologiialyq zertteýler júrgizý qajet ekenin atap ótti.
Depýtattyń aitýynsha, mundai jumystar sońǵy ret 1985 jyly júrgizilgen.
Senator Qazaqstanda týrizmdi damytýǵa qatysty ózekti máseleler kelesi jyldyń basynda «Qazaqstannyń ishki týrizmin damytý – ýaqyt talaby» taqyryby boiynsha parlamenttik tyńdaýda qaralatynyn atap ótti.
