Foto: Elements.envato.com
Jetisý oblysynda qumar oiyn biznesi men týrizmdi damytýǵa arnalǵan áleýetti jer telimderi aiqyndaldy. Bilik ókilderiniń aitýynsha, kazino salý máselesi óńirdi damytýdyń jalpy tujyrymdamasy, qala qurylysy talaptary men infraqurylymdyq múmkindikter eskerile otyryp qarastyrylýda, dep habarlaidy Ult.kz.
Jobalarǵa sáikes, bolashaqta ashylatyn qumar oiyn oryndaryna tek shetel azamattary ǵana kire alady. Sonymen qatar, bul aýmaqtarda týrizmge qatysty infraqurylym da qatar damytylmaq. Atap aitqanda, qonaqúiler, meiramhanalar, mádeni-saýyqtyrý jáne rekreatsiialyq nysandar salý, injenerlik jáne kólik jelilerin jetildirý josparlanyp otyr.
Qazirgi tańda qurylys jobalary áleýetti investorlarmen kelissóz kezeńinde. Jaýapty basqarmanyń málimetinshe, investorlardy irikteý jumysy júrgizilip jatyr. Barlyq zańnamalyq rásimder aiaqtalǵannan keiin tiisti kelisimsharttar jasalmaq.
Aita keteiik, Qazaqstannyń birqatar óńirinde tek sheteldikterge arnalǵan oiyn aimaqtaryn qurý múmkindigine qatysty saýalnama júrgizilgen. Týrizm ministrliginiń dereginshe, Jetisý oblysynda saýalnamaǵa qatysqandardyń 67 paiyzy kazino salýǵa qarsy emes. Alaida saýalnamaǵa naqty qansha adamnyń qatysqany kórsetilmegen.
Boljamǵa sáikes, 2029 jylǵa qarai óńirge jyl saiyn 36 myńǵa deiin sheteldik týrist kelýi múmkin. Bul shamamen 700 jańa jumys ornyn ashýǵa jáne jylyna 2,4 milliard teńge kóleminde salyq túsimin qamtamasyz etýge múmkindik beredi.
