Alakól – ainalaiyn jyraq turǵan,
Men Júsip, óleń sózdi qurastyrǵan.
Aiaqty isik shalyp, etik simai,
Sýyńa em bolar dep kelip turǵan.
At arbaǵa tańylyp, áreń jettim,
Arqada zalal qylyp bir anturǵan.
- depti, óz zamanynda, shipaly kólge em alýǵa kelgen, arqanyń seri jigiti Júsip Bainazaruly.
Osy Alakóldiń jaǵasyna, óz zamanynda jońǵar - qalmaqpen soǵysqan elimizdiń uly batyry Er Qabanbai, shaiqasta jaralanǵan sarbazdaryn kól sýyna alyp kelip, biraz kún qaldyryp ketedi eken. Qylysh shapqan, naiza jyrǵan, jebe tigen jaraly sarbazdar, sýdyn shipasymen qaitadan tik turyp, qatarǵa qosylatyn kórinedi. Kóldiń erekshe qasietin, sol zamannyń ózinde- aq qalyń qazaq bilgenge uqsaidy.
Osydan birneshe jyl buryn týrizm jáne sport ministrligi elimizdegi eń úzdik 10 týristik oryndy jariialady. Osy tizimge shipaly Alakól de enip otyr. Alakól jazǵy demalys aýmaǵy – qazirgi Abai oblysyndaǵy aldynǵy qatarly týristik aimaqtardyń biri jáne biregeii sanalady.
Alakól – tuzdy, aǵynsyz kól. Ásemdigimen kóńilge qýanysh uialatatyn ol teńiz deńgeiinen 347 metr biikte ornalasqan. Uzyndyǵy 104, eni 52 shaqyrymdy quraidy. Alakólde demalys oryndarynyń kóptep ornalasýy – sýynyń mineraldarǵa bai bolýynda. Onyń quramynda Mendeleev kestesindegi elementterdiń kóbi kezdesedi. Quramy jaǵynan Kanadanyń ataqty Atabaska kóline jáne Qara teńizge jaqyn.
Sýynyń jazdyq ortasha temperatýrasy – 26 gradýs. Sýdaǵy mineraldar tynys alý músheleri, súiek-bulshyq et, júike júiesi aýrýlarymen qosa, teri aýrýlarynda, radikýlit, ókpe, obyr aýrýynyń eń alǵashqy kezeńinde oń yqpal etip, jazylýǵa jaǵdai týdyrady.
2022 jyly Alakól demalys aimaǵynda 250 kásipkerlik nysany qyzmet kórsetse, byltyr taǵy 14 demalys úii ashyldy. Olardyń ishinde «Orient Alakól», «Atlant», «Temirlan», «Nomad», «Dostyq», «Kárim», «Jaǵalaý», «Hansultan», «Nurjaý», «Dolchevita», «Roýal Relax», «Ermada», «Dostar» syndy bazalar oryn tepken.
Kelýshilerge kórsetiletin qyzmet aiasy jyl saiyn keńeiýde. Kól jaǵasynda «bir tereze» qaǵidaty boiynsha «Tourist info» atty oblystyń alǵashqy týristik-aqparattyq ortalyǵy jumys isteidi, eki menedjer demalýshylarǵa tegin aqparattyq-konsýltatsiialyq kómek kórsetedi.
Alakólge kelýshiler sany jyldan-jylǵa artyp, demalys úileri de kóbeiip keledi.
Kól jaǵalaýyndaǵy demalys úileri kórikti jáne dámhanalardyń sany da kóp. Zamanaýi talapqa sai «Parýs», «Injý», «Alakól-Arasan», «Áigerim», «Kerýen», «Nomad», «Alakol Family Club» siiaqty iri demalys oryndary salynyp, demalys aýmaǵynyń sánin keltirip tur.
Jyl saiyn kól jaǵasynda «Alakól alaýlary» festivali uiymdastyrylyp keledi.
Qalai desek te, búginde Alakól jaǵasy adam tanymastai ózgergen. Aldaǵy ýaqytta demalys aimaǵynyń halyqaralyq dengeige jeteri anyq.
