Almatyda tórt ailyq sábiin qushaǵyna alyp jumys istegen jas ananyń oqiǵasy belgili boldy, dep habarlaidy ult.kz Arasha.kz saityna siltep.
Almaty kóshelerinde tórt ailyq sábiin kóterip júrip kýrerlik qyzmet atqarǵan 20 jastaǵy kelinshektiń oqiǵasy kópshiliktiń nazaryn aýdardy. Jas otbasynyń jaǵdaiyn anyqtaǵan qoǵam belsendisi Almat Nesipqaliev olardyń aýyr qarjylyq qiyndyqqa tap bolǵanyn aitty.
Belgili bolǵandai, erli-zaiypty qazir jaldamaly bir bólmeli baspanada turady. Otbasy turǵyn úi máselesin sheshemiz degen alaiaqtardyń arbaýyna túsip, qomaqty qaryzǵa batqan. Sol kúni olar jaldaý aqysyn tóleýi tiis bolǵan.
Jas ananyń aitýynsha, memleketten alatyn 25 myń teńge kólemindegi járdemaqy kúndelikti azyq-túlik shyǵyndarynan artylmaidy. Budan bólek, olardyń nesielik bereshekteri men lombardqa ótkizilgen zattardyń ósimpuly bar. Al kýrerlik qyzmette bir tapsyrys úshin shamamen 500-600 teńge ǵana tólenedi.
Otbasy otaǵasynyń da densaýlyǵy syr bergen. Ol jaldamaly kólikpen taksi júrgizýshisi bolyp jumys isteidi. Dárigerler oǵan shuǵyl ota qajet ekenin aitqanymen, qarjylyq qiyndyqtarǵa bailanysty emdi keiinge qaldyrýǵa májbúr bolǵan. Qazirgi tańda ol aýyrsynýdy basatyn dárilerdiń kómegimen jumysyn jalǵastyryp júr.
Osylaisha, kúnkóris qamymen jas ana tórt ailyq sábiin ózimen birge alyp shyǵyp, kýrerlik qyzmet kórsetýge májbúr bolǵan. Sonymen qatar Almat Nesipqaliev ázirge bul otbasy úshin eshqandai qarajat jinaý uiymdastyrylmaǵanyn aityp, jurtshylyqty alaiaqtardyń arbaýyna túspeýge shaqyrdy.
