Almaty qalasyndaǵy Ál-Farabi dańǵylynda bolǵan qaiǵyly jol-kólik oqiǵasy boiynsha sot protsesi jalǵasýda. Bul joly sotta apat saldarynan kóz jumǵan Tomiris Qydyrbektiń anasy Arailym Esenbaeva sóz sóilep, aiyptalýshy Aleksandr Pakqa qatysty ustanymyn málimdedi, dep habarlaidy ult.kz HALYQSTAN Telegram arnasyna silteme jasap.
Mamandandyrylǵan aýdanaralyq qylmystyq sotta ótken otyrys kýágerlerdi tyńdaýdan bastaldy. Kýáger Adam Marhiev apat aldynda dostarymen, onyń ishinde Aleksandr Pakpen birge dámhanada bolǵanyn aitty. Alaida ol ústelde alkogoldik ishimdik bolmaǵanyn málimdedi.
– Múmkin men ketkennen keiin tapsyrys bergen shyǵar. Men otyrǵan kezde ústelge alkogol qoiylǵan joq, – dedi kýáger.
Aita keteiik, buǵan deiin prokýror aiyptaý aktisin oqyǵan kezde saraptama qorytyndysy boiynsha Aleksandr Paktyń jol apaty kezinde jeńil dárejede mas kúide bolǵany anyqtalǵanyn habarlaǵan.
Keiin sot otyrysyna marqum Tomiristiń anasy Arailym Esenbaeva qosyldy. Ol qyzynyń qazasy týraly 21 naýryz kúni tańǵy saǵat 9-da habar alǵanyn jáne keiin máiithanaǵa baryp, qyzyn tanyǵanyn aitty.
Sýdianyń aiyptalýshyǵa qatysty qandai da bir talaby bar-joǵy týraly suraǵyna ol:
– Qazirgi tańda eshqandai talabym joq. Barlyǵy zań aiasynda sheshilsin, sot qalai sheshse, solai bolsyn, – dep jaýap berdi.
Sot barysynda onyń buǵan deiin jazǵan ótinishi de oqyldy. Ótinishte Aleksandr Paktyń jasaǵan isine ókinip, keshirim suraǵany jáne moraldyq shyǵyndy ótegeni kórsetilgen.
Marqumnyń anasy aiyptalýshyǵa qatysty materialdyq jáne moraldyq talaptarynyń joq ekenin aityp, sottan oǵan bas bostandyǵynan aiyrýmen bailanysty emes jaza taǵaiyndaýdy suraǵan.
Buǵan deiin osy apatta qaza tapqan Elaman men Qumardyń týystary da Aleksandr Pakty keshirip, oǵan qatysty talaptarynan bas tartqan bolatyn. Olardyń aitýynsha, aiyptalýshy keltirilgen moraldyq jáne materialdyq shyǵynnyń ornyn toltyrǵan.
Sotta taǵy bir kýáger – Aigerim Abdraimova da jaýap berdi. Onyń sózinshe, apatqa deiin ótken kezdesýge qurbysy shaqyrǵan. Alaida ol otyrǵan ortany unatpaǵandyqtan kóp uzamai ketip qalǵan.
– Adamdardy, qyzdardy talqylaǵandary unamady, – dedi kýáger.
Sondai-aq ol dastarhanda alkogol bolǵanyn rastady. Alaida spirttik ishimdikti ózi men qurbysy ishkenin, al Aleksandr Paktyń ishimdik ishken-ishpegenin kórmegenin aitty.
Qazirgi ýaqytta sot otyrysy jalǵasyp jatyr. Is boiynsha barlyq mán-jailar sot barysynda anyqtalmaq.
