QR Mádeniet jáne sport ministri Aqtoty Raiymqulova Ábý Nasyr ál-Farabidiń 1150 jyldyq mereitoiy qurmetine uiymdastyrylǵan dóńgelek ústel otyrysyna qatysty, dep habarlaidy QazAqparat.
Ministrdiń aitýynsha, biyl jyl basynan beri 100-den asa shara uiymdastyrylǵan.
«Koronavirýs pandemiiasyna bailanysty sharalardyń kópshiligi qysqartyldy. Negizinen, ǵylymi zertteýge baǵyttalǵan sharalarǵa basymdyq berildi. Ókinishke orai, josparlanǵan ekspeditsiialar bolmai qaldy. Josparlanǵan qarajat respýblikalyq biýdjetke qaitaryldy. Bolashaqta bul jumys jalǵasatyn bolady. Sondai-aq, ǵylymi zertteý ortalyqtary ashylady», - dedi Aqtoty Raiymqulova.
Biyl uly shyǵys ǵulamasynyń eńbegin zertteýge arnalǵan QazUÝ men basqa da sheteldik oqý oryndarynyń qatysýymen onlain konferentsiialar ótken.
Keleshekte Túrkistan oblysynyń Oqsyz kóne qalashyǵyna jaqyn jerde shaǵyn mýzeii bar Vizit ortalyq ashylady.
Sháýildir aýylynda qazir osyndai Vizit ortalyǵy bar. Ol jerden Ábý Nasyr ál-Farabidiń 1150 jyldyǵyna orai qoiylǵan ǵylymi materialdardy, ekspozitsiialardy kórýge bolady.
Odan bólek, Aqtoty Raiymqulova atap ótkende, Siriianyń Damask qalasynda uly ǵulamanyń Vizit ortalyǵy men mýzeii jumys istep tur.
«Ol ortalyqta QazUÝ bólimshesi ashylady. Atalǵan bólimshede de biyl ǵylymi jáne qalpyna keltirý jumystaryn jalǵastyratyn bolamyz. Ál-Farabi adam resýrstaryn túsinýge kóp eńbek sińirdi. Odan bólek, mádeniet pen mýzykaǵa qatysty eńbekteri de orasan zor. Ol ónerdi adamzat turmysynyń mańyzdy bóligi retinde qarastyrǵan. Sondyqtan, zertteýshiler únemi onyń eńbekterine oralady. Ǵalymnyń eńbekteri men tujyrymdamasynyń mańyzy orasan. Onyń murasyn álemge tanystyrý, nasihattaý úshin bizge kóp eńbektený kerek», - dedi ministr.
