Fýtboldan Qazaqstan chempionatynyń 11-týrynda Oraldyń «Aqjaiyǵy» óz alańynda Almatynyń «Qairatyn» qabyldady, dep habarlaidy "Ult aqparat".
El chempiony «Qairat» buǵan deiin 17 upaimen úshinshi orynda kele jatsa, odan eki upaiy kem oraldyq komanda 5-satyda edi.
«Aqjaiyqtyń» quramynda ótken oiynda jaraqat alyp qalǵan qaqpashy Sergei Litovchenkonyń ornyna Ilia Karavaev shyqty.
Birinshi taimda almatylyqtar kóbirek shabýyldaǵanymen, esep ashylǵan joq.
Oiynnyń ekinshi kezeńinde 54-minýtta qarymta shabýyl kezinde «Aqjaiyq» sapyndaǵy belorýssiialyq qorǵaýshy Pavel Nazarenko alǵa shyǵyp ketken «Qairattyń» qaqpashysy, Oral fýtbolynyń túlegi Stas Pokatilovtan dopty asyra saldy.
Match sońyna taman buryshtamadan berilgen dopty «Qairat» quramyndaǵy serbiialyq qorǵaýshy Rade Dýgalich baspen soqqanymen, ol qaqpa jaqtaýynan keri qaitty.
Osylaisha premer-ligadaǵy biýdjeti eń az klýb bolǵanyna qaramastan, biyl qarqyndy oiyn órnegin kórsetip kele jatqan «Aqjaiyq» qatarynan úshinshi jeńisine qol jetkizdi – 1:0.
Týrnir kestesinde 18 upaimen úshinshi orynǵa kóterilgen ýkrainalyq maman Vladimir Maziardyń shákirtteri kelesi kezdesýin 18 mamyr kúni syrt alańda «Turanmen» ótkizedi.
