فۋتبولدان قازاقستان چەمپيوناتىنىڭ 11-تۋرىندا ورالدىڭ «اقجايىعى» ٶز الاڭىندا الماتىنىڭ «قايراتىن» قابىلدادى, دەپ حابارلايدى "ۇلت اقپارات".
ەل چەمپيونى «قايرات» بۇعان دەيٸن 17 ۇپايمەن ٷشٸنشٸ ورىندا كەلە جاتسا, ودان ەكٸ ۇپايى كەم ورالدىق كوماندا 5-ساتىدا ەدٸ.
«اقجايىقتىڭ» قۇرامىندا ٶتكەن ويىندا جاراقات الىپ قالعان قاقپاشى سەرگەي ليتوۆچەنكونىڭ ورنىنا يليا كاراۆاەۆ شىقتى.
بٸرٸنشٸ تايمدا الماتىلىقتار كٶبٸرەك شابۋىلداعانىمەن, ەسەپ اشىلعان جوق.
ويىننىڭ ەكٸنشٸ كەزەڭٸندە 54-مينۋتتا قارىمتا شابۋىل كەزٸندە «اقجايىق» ساپىنداعى بەلورۋسسييالىق قورعاۋشى پاۆەل نازارەنكو العا شىعىپ كەتكەن «قايراتتىڭ» قاقپاشىسى, ورال فۋتبولىنىڭ تٷلەگٸ ستاس پوكاتيلوۆتان دوپتى اسىرا سالدى.
ماتچ سوڭىنا تامان بۇرىشتامادان بەرٸلگەن دوپتى «قايرات» قۇرامىنداعى سەربييالىق قورعاۋشى رادە دۋگاليچ باسپەن سوققانىمەن, ول قاقپا جاقتاۋىنان كەرٸ قايتتى.
وسىلايشا پرەمەر-ليگاداعى بيۋدجەتٸ ەڭ از كلۋب بولعانىنا قاراماستان, بيىل قارقىندى ويىن ٶرنەگٸن كٶرسەتٸپ كەلە جاتقان «اقجايىق» قاتارىنان ٷشٸنشٸ جەڭٸسٸنە قول جەتكٸزدٸ – 1:0.
تۋرنير كەستەسٸندە 18 ۇپايمەن ٷشٸنشٸ ورىنعا كٶتەرٸلگەن ۋكراينالىق مامان ۆلاديمير مازياردىڭ شەكٸرتتەرٸ كەلەسٸ كەزدەسۋٸن 18 مامىر كٷنٸ سىرت الاڭدا «تۇرانمەن» ٶتكٸزەدٸ.
