Qazaqstannyń Bas prokýratýrasyna Qytaida esirtki tasymaly úshin ómir boiyna bas bostandyǵynan airylǵan Aqjarqyn Turlybaidan jazasyn týǵan jerinde óteý týraly ótinish túsken joq. Bul týraly QR Bas prokýrorynyń orynbasary Marat Ahmetjanov aitty, dep habarlaidy QazAqparat.
«Bizdiń málimetimizge sáikes, búginde onyń úkimi zańdy kúshine endi. Qytai Halyq Respýblikasymen sottalǵan azamattarymyzdy bir-birimizge berý týraly ekijaqty kelisimshart bar. Birinshi sharty – ol óziniń sottylyǵyn Qazaqstan Respýblikasynda óteýge nietti ekendigi týraly jazbasha ótinish berýi tiis. Sodan keiin QHR prokýratýrasyna qazaqstandyqty týǵan jerine estraditsiialaý múmkindigi týraly habarlama jiberedi», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, Aqjarqyn Turlybai Qytaida esirtki kontrabandasy úshin bas bostandyǵynan airylyp otyr. Qazaqstanda da esirtki tasymaldap, satqany úshin bas bostandyǵynan aiyrý jazasy kózdelgen.
«Eger onyń áreketi osyǵan orai bolsa, onda menińshe, kelisimshartqa sáikes jáne barlyq materildar zerdelengennen keiin ony Qazaqstanda jazasyn óteý úshin ekstradtsiialaýǵa tolyq múmkindik bar. Biraq, ázirshe onyń tarapynan búginge deiin bas prokýratýraǵa ótinish túsken joq. Munan bólek, qoǵaýshylary, QHR-daǵy konsýldyǵymyz, Elshiligimiz bar. Osyǵan orai bizge resmi ótinim túse salysymen osy baǵyttaǵy jumysty bastaimyz», - dedi Marat Ahmetjanov.
Buǵan deiin habarlanǵandai, 2019 jyldyń 27 jeltoqsanynda Gýanchjoý qalasynyń Halyq sotynda esirtki kontrabandasy úshin aiyptalǵan qazaqstandyq Aqjarqyn Turlybaiǵa qatysty qylmystyq is boiynsha úkim jariialandy. Qytai soty ómir boiy bas bostandyǵynan aiyrý týraly úkimdi ózgerissiz qaldyrdy. Keiinnen qorǵaýshy tarap sot úkimine shaǵym jasady. Alaida, qosymsha tergeý nátijeleri boiynsha sot bastapqy úkimdi ózgerissiz qaldyrdy. Qolda bar aqparatqa sáikes, A.Turlybai osy aidyń ishinde Gýandýn provintsiiasy túrmeleriniń birine aýystyrylady.
Jaqynda Syrtqy ister ministrligi Aqjarqyn Turlybaidy Qazaqstanǵa berý rásimin qoldaný qarastyrylyp jatqany týraly habarlady.
