Tarih ǵylymdarynyń doktory, Memleket tarihy institýtynyń direktory Erkin Ábil QR Prezidenti Qasym-Jomart Toqaevtyń «Qazaqstan» telearnasyna bergen suhbatynan qandai oi túigenin aitty, dep habarlaidy QazAqparat.
«Prezidenttiń «Qazaqstan» telearnasyna bergen suhbatynyń qorytyndysy boiynsha birneshe qyzyqty tujyrym jasaýǵa bolady. Birinshisi – Q.Toqaev búginde eldiń bárin alańdatyp otyrǵan ótkir taqyryptardan qashqaqtamaidy. Áleýmettik jelide, messendjerlerde, asúilerde talqylanyp júrgen suraqtardyń bárine jaýap berildi.
Ekinshisi – Prezidentti áleýmettik jelide synaýshylar ne aitsa da, ol beibit sherýshiler men terroristerdiń, maroderlerdiń aiyrmashylyǵyn jaqsy bilip otyr. Quqyq qorǵaý organdarynyń zańǵa qaishy tásilderdi paidalaný máselesin de jaqsy túsinip otyr. Meniń oiymsha, bul taqyrypqa mai quiýdy toqtatyp, tergeý qorytyndylaryn kútetin kez keldi.
Úshinshisi – reformalar bolady. Suhbattyń eń basty messedji osy dep oilaimyn. Jýrnalist suhbatty qaita-qaita qańtar taqyrybyna burýǵa tyrysqanyna qaramastan, Prezident keleshektegi reformalar, qańtar oqiǵasynyń sabaǵy týraly áńgimege oiysyp otyrdy.
Onyń paiymynsha, tek qańtar oqiǵasynan ǵana emes, jalpy keiingi 30 jyldan úlken sabaq alýymyz kerek.
Eń bastysy – Prezident radikaldy, jyldam sheshimderdi jaqtamaidy. Kúrdeli suraqtarǵa ońai jaýap berip qutylýǵa qarsy. Odan revoliýtsiia ánindegidei «áýeli ózegin qurtaiyq, sodan keiin kórermiz» degenge saiatyn áreketter kútýdiń, talap etýdiń tipten qajeti joq. Bálkim bireýlerge ol ásire saq kórinýi múmkin. Biraq ony aqylmen áreket etip jatqan joq dep eshkim jazǵyra almaidy. Búginge deiin ol syrttaǵy da, ishtegi de kúshterdiń arasynda teńgerim saqtai otyryp, saraptalǵan saiasat ustanyp keledi. Qazir Qazaqstanǵa keregi de osy. Aqyry nemen tynatyny belgisiz azamattyq qaqtyǵystarǵa jol berýge bolmaidy», - dedi tarihshy.
