Aqyn Almas Temirbai aqyndardyń sezimi qaǵazǵa túskendikten, kúnde ǵashyq bolǵan siiaqty seziledi degen oiymen bólisti. Ol bul týraly otandyq arnalardyń birinde áriptesimen áńgime barysynda talqylaǵan, – dep habarlaidy «Ult aqparat».
Alǵashqy óleńi kóktem týraly bolǵan aqyn, stýdent kezinde qatarlastaryna qaraǵanda óleńderi álsiz bolǵanyn moiyndady. Sodan keiin týǵan jerine ketip, «men myqty óleń jazbaiynsha, Almatyǵa barmaimyn» degen oi túiedi.
«Sóitip-sóitip halyqaralyq «Shabyt» festivaline deiin keldik qoi. Ómirimde bir otyz shaqty músháiradan jeńimpaz boldym. Jaishylyqta kóp sóilemeimin, tynyshtyqty jaqsy kóremin. dalada júrgendi, jeke júrgendi unatamyn. Júirik at ta saiaq jýsaǵandy, júrgendi jaqtyrady ǵoi. Eshkimniń tobynda joqpyn, eshkimniń aǵymynda joqpyn, eshkimniń partiiasynda joqpyn. Eń bastysy táýelsiz bolýǵa tyrysamyn.
Aqyndardyń beisharalyǵy ǵashyq bolsa aitady, jazady, kúnde ǵashyq bolǵan siiaqty seziledi. Ár adam ǵashyq bolady, oilaidy, saǵynady, izdeidi. Biraq ol sol sátte umytylady ǵoi. Aqyndardyki qaǵazǵa túsedi», – deidi Almas Temirbai.
Aqynnyń eń qiyn sátteriniń biri, mektep bitirip jatqan kezde 25 mamyrda atasy qaitys bolypty. Bul da aqynǵa ońai timegen. Sonymen qatar, ómirdegi kei sátsizdikteri de aqynnyń óleńine jan bitirgendei kórinedi.
«Jurt sońǵy qońyraýǵa baryp jatqan kezde, men zirat basynda júrdim, atamdy jerlep. Meni 16 jasqa jetkizip ketti. Sátsiz nekem áser etti. Sonyń bári meni aqyn qylǵan shyǵar. Oilandyrǵan shyǵar, túzý jolǵa túsirgen shyǵar, onyń bári bir Qudaiǵa aian.
Bir ai eshkimmen sóilespei júre alamyn, mysaly. Eshkimdi izdemeýim de múmkin. Óz álemińmen, óz oiyńmen júresiń ǵoi. Kóbine túnde jazamyn. Jeke, jalǵyz, tynysh jerde jazamyn. Jazý úshin shabyt kerek. Ózim shabyt degendi bylai túsinemin: midyń óte jyldam jumys isteýi. Shabyttanyp otyrǵan kezde bir sekýndtyń ishinde qanshama oi keledi, bir sózdiń qanshama sinonimi keledi, antonimi keledi. Miyń kompiýterdiń protsesindei jyldap jumys isteidi. Sol kezde jazyp qalý kerek qoi», – deidi aqynnyń ózi.
Aitýynsha, ol búginde kezekti kitabyn baspaǵa daiyndap jatyr. Jazatyn poemalary da bar.
«Qazir izdenip, zerttep júrgen taqyrybym Muhtar Áýezovtiń «Abai joly» romanyndaǵy bas keiipkerdiń biri Bazaraly batyr. Ol týraly arhivten derekterin izdep Ombyǵa barmaqshymyz. Onyń taǵdyry qiyn, qupiialy, kóp syrlar endi ashylyp jatyr. Mysaly, Qunanbailar ol kisini Sibirge jer aýdarady ǵoi, qasynda joldastarymen aidalyp kete barady. Sol jaqta túrmeniń bastyǵyna shart qoiyp, «seniń aiýyńmen kúreske shyǵamyn, eger aiýdy jeńsem, onda meni, Balaǵazy aǵamdy jáne qasymdaǵy 16 jigitti bostandyqqa jiberesiń» dep shart qoiyp, aiýmen alysyp, sodan bastaryna bostandyq alyp, merziminen buryn bosap keledi. Ol kisiniń urpaqtary tek Semeide ǵana emes, osy Kókshetaýdyń mańaiynda da bar. Týystary da bir-birin jańa bilip jatyr. Árine, men arhivtiń derekterine súienip jazamyn. Aqsaqaldardyń áńgimesin tyńdap, meniń oiymsha bir keremet poema shyǵatyn siiaqty.
Bárimiz de tabiǵatty jaqsy kóremiz ǵoi. Sonyń ishinde men aǵashtardy jaqsy kóremin. Qalanyń shetinde ózime unaityn aǵashtarym bar, energiia alatyn aǵashtarym bar. Kókshetaýdan Astanaǵa bara jatyp ta, kólikti toqtatyp. orman aralap júretin kezder bolady. Biletin áýlie adamdardyń aitýy boiynsha, áýlie adamdardyń boiynda aq energiia bolady, jaman nietti «qara magiiamen» ainalysatyn adamdarda qara energiia bolady, aqyndarda, óner adamdarynda qyzyl energiia bolady, moldalarda, áýlie kisilerde kók energiia bolady. Endi qyzyl energiiany kóbeitý úshin óner adamdary, aqyndar tabiǵatqa jaqyn bolý kerek. Biik qyrdyń, taýdyń basyna shyǵyp, qolyńdy sozyp turǵannyń ózi, jeldi sezinýdiń ózi keremet kúsh beredi. Jalańaiaq júrgen de óte paidaly, jerdiń energiiasyn alýǵa bolady», – deidi aqyn Almas Temirbai.
Býrabai baýyrynda, týǵan jerge qyzmet etip júrge aqyn búginde oblystyń qazaqshalanýyna birshama eńbek sińirgeni jasyryn emes. Kóshe attaryn qazaqshalap, endi aýyl attaryn da retke keltirýdi josparlap otyr.
«Sońǵy 4-5 jylda úlken jumys atqarylyp jatyr. Ol tek meniń, bizdiń jigitterdiń ǵana eńbegi emes, qalalyq mádeniet bóliminiń, oblystyq ishki saiasat basqarmasynyń da jumysy. Osy qalanyń kósheleriniń toqsan paiyzy qazaq qazaqshalandy, azdaǵan kóshe ǵana qaldy, basqa ulttardyń aqyn-jazýshylarynyń ǵana attary qaldy, qalǵany túgel qazaqsha. Biylǵy maqsat Zerendi aýdany, Býrabai aýdany, Tselinograd aýdany, sol jaqtyń aýyldarynyń atyn qazaqshalaý bolyp tur», – deidi Almas Temirbai.
