Byltyr QR Indýstriia jáne infraqurylymdyq damý ministrligi aqyly jol ýchaskelerinde jeńildikpen júrýge túzetýler engizýdi kózdeitin zań jobasyna bastamashy boldy. Qujat jeńildik berilgen adamdar tizimin ulǵaitýdy qarastyryp otyr, dep habarlaidy "Ult aqparat".
«Osylaisha, respýblikalyq mańyzy bar joldardaǵy aqyly ýchaskelermen jeńildikpen júretinderdiń qataryna soǵys ardagerleri men olarǵa teńestirilgen tulǵalardy qosý kózdelýde. Qazir zań jobasy QR Parlamenti Májilisinde qarastyrylyp jatyr», - delingen ministrlik málimetinde.
Búginde aqyly jolǵa irgeles eldi mekenderde turatyn paidalanýshylardyń bir aýdannyń shegine ótý úshin 1000 teńgeni quraityn jyldyq tarifti qoldanýǵa múmkindigi bar.
Jolaýshylardy turaqty tasymaldaýdy júzege asyratyn avtobýstar, aqyly jolǵa irgeles aýdandardaǵy avtobýstar, jedel meditsinalyq kómek qyzmetteri, órt sóndirý jáne tótenshe jaǵdailar qyzmetteri, patrýldik politsiia men áskeri tehnikalar tarifterden bosatylǵan.
Esterińizge sala keteiik, biyl uzyndyǵy 5,8 myń shaqyrym joldy aqyly etý boiynsha jumystar júrgizilip jatyr. Bul kelesidei jol ýchaskeleri: «Shymkent – Ózbekstan shekarasy», «Oral – RF shekarasy (Saratov)», «Oral – RF shekarasy (Samara)», «RF shekarasy (Orenbýrg) – Aqtóbe», «Shýchinsk – Petropavl», «Qostanai – RF shekarasy (Troitsk)», «Shymkent – Qyzylorda», «Shymkent – Taraz», «Taraz – Qainar», «Qapshaǵai – Taldyqorǵan», «Atyraý – Beineý – Ózbekstan shekarasy», «Qarabutaq – Qyzylorda», «Aqtóbe – Oral», «Aqtaý – Beineý», «Nur-Sultan – Qostanai», «Pavlodar – RF shekarasy (Omby)», «Nur-Sultan – Pavlodar», «Pavlodar – Semei – Qalbataý».
