© Sputnik / Abzal Kaliev
Kólik ministri Marat Qarabaev aqyly joldardyń baǵasyn 20 protsentke kóterý josparyn túsindirdi, dep habarlaidy «Ult aqparat» Sputnik Qazaqstan-ke silteme jasap.
Ministrdiń aitýynsha, árbir joldyń aqysy túrli deńgeide kóteriledi. Sebebi eń arzan aqyly joldar – Qazaqstanda: bir shaqyrymy – 1 teńge. Al aqyny kótergennen keiin 1 teńge 25 tiyn bolady.
"Máselen, "Astana-Býrabai" jolynyń aqysy qazir 220 teńgeni quraidy. Negizi, kem degende 400 teńge bolýy kerek. "Almaty-Qaraǵandy" jolyn áli iske qosqan joq. Biraq paidalanýǵa berilgende bir shaqyrymy úshin 1 teńge bolmaidy, ol anyq aita alamyn, shamamen, 3 teńge bolady. Biz osy máseleni talqylap jatyrmyz", - dedi Qarabaev úkimette ótken brifingte.
Onyń aitýynsha, kórshi elderde aqyly joldyń baǵasy 7 ese, tipti, 15-20 esege qymbat.
"Bizdiń júk kólikterimiz ol jaqqa barǵanda 7 ese qymbat tóleidi. Al olardyń kólikteri bizde 7 ese arzan baǵamen júredi. Ádiletsiz emes qoi. Biz – tranzittik elmiz, sol sebepti tranzitpen ótetin kólikter kóp. Al otandyq kólik júrgizýshileri úshin 15 protsentke deiin jeńildikter qarastyrylǵan. Joldyń boiynda turatyn halyq abonenttik tólemmen júredi", - dep atap kórsetti Qarabaev.
