Aqyly bilim berý olimpiadalarynyń Bilim jáne ǵylym ministrligine qatysy joq. Bul týraly QR Bilim jáne ǵylym vitse-ministri Sholpan Karinova aitty, dep habarlaidy QazAqparat.
«Qoǵamda kóp talqylanyp júrgen máselege toqtalyp ótpekpin. Bul óz kezeginde uiymdastyrylyp jatqan aqyly olimpiadalar men konkýrstarǵa qatysty. Qazirgi kezde qazaqstandyq bilim berý naryǵynda jekemenshik kásiporyndar men uiymdar da osy qyzmetterdi usynyp keledi. Olar túrli aqparat kózderi arqyly ata-analarǵa da, oqýshylarǵa da, muǵalimderge de, mektepterge de málimetterdi tolyqtai jetkizip turady. Bul qyzmet kórsetý salasy litsenziialanbaidy jáne ministrlik tarapynan resmi turǵyda ruqsat alýdy qarastyrmaityn qyzmet túri. Qazirgi kezdegi tájiribede osy konkýstardyń barlyǵy aqyly túrde ótkizilip jatyr. Olarǵa qatysý úshin ata-analar óz qarajatyn salady», - dedi Sh. Karinova Ortalyq kommýnikatsiialar qyzmetinde.
Osy oraida ol atalǵan aqyly jarystardyń deńgeii túrli dárejede ekenin atap ótti.
«Ata-analar men muǵalimderdiń atap ótýinshe, olardyń ishinde óte nashar uiymdastyrylatyndary da kezdesedi. Sonymen qatar, balalardyń damýy turǵysynan qyzyqty ári tanymdyq túrde ótkiziletin olimpiadalar barshylyq. Kóbinese bul uiymdar olimpiadalar ataýyn ministrliktiń tizbesinde bekitilgen jarystar sekildi etip jariialaidy. Biraq Bilim jáne ǵylym ministrliginiń bul aqyly jarystarǵa eshqandai qatysy joq ekenin atap ótemin. Sondyqtan balalar men muǵalimder, mektepter ártúrli olimpiadalar men konkýrstarǵa oqýshylardyń qatysýyn tańdaǵan kezde muqiiat bolýyna keńes beremiz», - dedi vitse-ministr.
Onyń aitýynsha, óz qarajatyn jumsamas buryn, ata-analar uiymdastyrýshynyń kim ekenin, balalardy damytýda qandai tájiribesi bar ekenin, balalardyń olarǵa ne úshin qatysýy kerektigin, olardyń qandai daǵdylardy damytatynyn anyqtaý alýy mańyzdy.
