Aqyly ekpe kabinetterinde KVI-ge qarsy vaktsina salynbaidy. Nelikten mundai shekteý baryn búgingi lektoriide QR DSM Sanitariialyq-epidemiologiialyq baqylaý komitetiniń vaktsinaǵa kónetin infektsiialardy baqylaý basqarmasynyń basshysy Nurshai Ázimbaeva túsindirdi, dep habarlaidy QazAqparat.
«Koronavirýsqa qarsy vaktsinalaý bizdiń eldiń azamattary úshin tegin bolady. Sol sebepti Úkimettiń rezervinen osy maqsatta qarajat bólinedi. Qansha qarajat kerektigi jóninde Qarjy ministrligine málimet joldanǵan. Búgin nemese erteń bizdiń elge vaktsinalar jetkizilýi kerek. Vaktsinalaý – memlekettik qurylymdarda, Densaýlyq saqtaý ministrliginiń quzyryndaǵy emhanalardyń ekpe kabinetterinde ǵana qoljetimdi ekenin eskerý kerek. Iaǵni aqyly ekpe kabinetterinde nemese vaktsinalaý klinikalarynda koronavirýsqa qarsy vaktsina egilmeidi», - dedi Nurshai Ázimbaeva Zoom arqyly uiymdastyrylǵan lektoriiada.
Basqarma basshysy aqyly ekpe kabinetterinde koronavirýsqa qarsy vaktsina nelikten egilmeitinin túsindirdi.
«Bir de bir óndirýshi (vaktsinany) jeke qurylymdarmen jumys júrgizbeidi. Iaǵni óndirýshilerdiń bári eń aldymen memlekettik qurylymdaǵy emhanalardy vaktsinamen qamtýdy maqsat etedi. Sondyqtan jeke klinikalar, jeke meditsinalyq uiymdar óndirýshiden vaktsinany satyp ala almaidy. Biz vaktsinalaý maqsatynda óte aýqymdy kontingentti qarastyryp jatyrmyz», - dedi ol.
