QR BǴM Qoǵamdyq keńesi «Aq Jol» partiiasynyń aqyly negizde JOO-ǵa túsýshi jastar úshin UBT-ny alyp tastaý týraly bastamasyn talqylady, dep habarlaidy ministrliktiń baspasóz qyzmeti.
«Aq Jol» partiiasy ókiliniń pikirinshe, Qazaqstanda granttardy bólý týraly qoldanystaǵy júie jetildirýdi qajet etedi. Onyń ústine, bizdiń túlekterge Chehiia, Resei, Qytai jáne ózge de memleketter tegin bilim alýǵa múmkindik berip otyr. Shet memlekette oqý bitirgen kóptegen jas mamandar elge oralmaidy.
«Kóptegen memleket, sonyń ishinde Resei men Qytai, joǵary bilim alǵan adamdardyń sanyn arttyrýǵa talpynýda. Mundai úrdis bizde de bar. Sol sebepti joǵary bilimniń qoljetimdiligin keńeitý, onyń ishinde jastardyń UBT tapsyrýǵa baǵyttalǵan jáne ikemdi sharttaryn jasaý qajet», - deidi Qoǵamdyq keńes tóraǵasy Serik Irsaliev.
Qoǵamdyq keńes ministrlikke joǵary oqý oryndaryna aqyly negizde túsetin talapkerler úshin UBT-ny alyp tastaý jáne UBT-ny memlekettik bilim grantyn alý úshin konkýrstyq irikteý quraly retinde belgileý maqsatynda normativti-quqyqtyq aktilerge ózgerister men tolyqtyrýlar engizý týraly máseleni qarastyrýdy usyndy.
Sonymen qatar Qoǵamdyq keńes qazaqstandyq jastardyń eń jaqsy sheteldik joǵary bilim baǵdarlamalaryna qol jetkizý múmkindikteriniń keńeiýine qatysty óz oiyn bildirdi jáne BǴM-ǵa Qazaqstanda, eń bastysy - Astanada sheteldik joǵary oqý oryndarynyń halyqaralyq kampýstaryn qurý tájiribesin belsendi damytý qajettigin jetkizdi.
