Senat depýtaty Aqylbek Kúrishbaev agrarlyq ǵylymdy tejep otyrǵan problemalardy atady, dep habarlaidy "Ult aqparat".
«Agrarlyq ǵylymnyń tiimdiligin tejeitin, óz qolymyzben jasap otyrǵan sebepterdiń biri – agrarlyq ǵylymi jobalar men baǵdarlamalardy iske asyrý merziminiń shekteýligi. Bizde ǵylymi konkýrstardyń talaby boiynsha oǵan 3-aq jyl beriledi. Bulai aýyl sharýashylyǵy ǵylymi zertteýlerdiń ýaqytyn shekteýge bolmaidy. Sebebi atalǵan saladaǵy zertteýler biýdjettik josparlaý merzimine emes, aýa-raiynyń erekshelikterimen bailanysty», - dedi Aqylbek Kúrishbaev Parlament Senatynyń ǵylym jónindegi zań jobasyn talqylaý kezinde.
Onyń aitýynsha eshbir elde aýyl sharýashylyǵyndaǵy jańa suryptar, tehnologiialar 3 jyl ishinde jasalmaidy. Keńes odaǵy kezeńinde ǵylymi zertteýlerge kem degende 5 jyl ýaqyt beriletin.
«Qazir biz ózimizdiń ǵylymi jobalarymyzǵa sheteldik ǵalymdardy tarta almaǵandyqtan, sheteldik tehnologiialardyń transfertin qamtamasyz ete almai otyrmyz. Sebebi bizdiń seriktesterimiz 3 jyl merzimde aýyl sharýashylyǵynda mańyzdy ǵylymi nátijelerge qol jetkizýdiń múmkin emestigin túsinedi. Demek, agrarlyq ǵalymdarymyzdy biz ózimiz tyǵyryqqa tirep otyrmyz. Árine, osydan keiin óndiristiń suranysyn ótei almaityn, «shiki» ǵylymi jobalar paida bolady», - deidi ol.
Senator jalpy, qazaqstandyq ǵylymnyń qazirgi deńgeiin kórsetetin tómendegi derekterge nazar aýdarýǵa shaqyrdy.
«2020 jylǵy «Jahandyq innovatsiialyq indeks» reitingisine sáikes, Qazaqstan innovatsiialyq qyzmet tiimdiligi kórsetkishi boiynsha tek 77-orynǵa ie boldy. Damyǵan elder týraly aitpaǵanda, biz Resei men Belorýssiiadan aitarlyqtai artta qalyp, Armeniiadan, Mońǵoliiadan, Iamaika jáne Panamadan da tómengi orynǵa tústik. Al ózimizdiń statistikalyq derekterimizge súiensek, 2019 jyly bizdegi innovatsiialyq ónim kólemi eldiń jalpy ishki óniminiń nebári 1,6%-yn quraǵan, osy kórsetkish boiynsha biz Reseiden 8 ese, damyǵan elderden 20-30 ese artta qalyp otyrmyz. Nege bulai? Basty sebep – ǵylymdy qarjylandyrýdyń jetkiliksizdigi», - dedi ol.
Senator elimizdiń ǵylymy salasynda «velosipedti» qaita oilap tappai, álemde jinaqtalǵan tájiribeni qoldana otyryp, ǵylymi zertteýlerdi uiymdastyrýdyń zamanaýi júiesin engizý kerek dep esepteidi.
«Biz Bilim jáne ǵylym ministrligi jumysynyń qanshalyqty kúrdeli jáne kóp qyrly ekenin túsinemiz. Qurmetti Ashat Qanatuly, ózińizdiń basshylyǵyńyzben bilim-ǵylym salasynda biraz oń nátijeli jumystar júrip jatyr. Sonymen qatar, Sizden ǵylymnyń sapaly ǵylymi áleýetin qalyptastyrýǵa qatysty joǵaryda aitylǵan basym mindetterge nazar aýdarýyńyzdy suraimyn», - dep túidi ol.
