Aktsizder qunyn kóterip, qosylǵan qun salyǵyn kezeń-kezeńmen tómendetýden 237 mlrd teńge qosymsha túsim túsedi. Bul týraly búgin «QR keibir zańnamalyq aktilerine salyq salý jáne kedendik ákimshilendirý máseleleri boiynsha ózgerister men tolyqtyrýlar engizý týraly» Zań jobasy talqylanǵan Májilistiń jalpy otyrysynda Ulttyq ekonomika ministri Qýandyq Bishimbaev aitty, dep habarlaidy Vaq.kz tilshisi.
Bul zańdy osynyń aldynda Qarjy jáne biýdjet komiteti talqylap, jalpy otyrystyń qaraýyna engizgen bolatyn.
«Zań jobasy arqyly Salyq kodeksine 234 túzetý engiziledi. Onyń 27-si salyq saiasatyna, 207-si salyqtyq jáne kedendik ákimshilendirýge qatysty bolmaq. Zań jobasy biznestiń, sonyń ishinde agroónerkásip kesheniniń iskerlik belsendiligin saqtaýǵa, qoǵamdaǵy áleýmettik jáne ekonomikalyq turaqtylyqty jaqsartýǵa, jumys istemeitin nesieler deńgeiin tómendetýge jáne bankterdiń Qazaqstan ekonomikasyndaǵy úlesin arttyrýǵa baǵyttalǵan», -deidi Q.Bishimbaev.
Ministr aktsiz salyǵyn kóbeitý jáne qosylǵan qun salyǵy boiynsha tómengi shekti kezeń-kezeńmen tómendetýden túsetin qosymsha túsimder 237 mlrd teńge kóleminde bolady dep otyr.
«Respýblikalyq biýdjet komissiiasynyń qaraýyna usynylǵan 2015-2019 jyldarǵa arnalǵan biýdjet pen Ulttyq qor shyǵyndary 176 705,1 mln teńgeni qurap otyr. Sonymen qatar aktsizder mólsherlemesin ulǵaitýdan jáne qosylǵan qun salyǵynyń tómengi shegin kezeń-kezeńmen tómendetýden 237 001,1 mlrd teńge qosymsha túsim túsedi», - deidi Qýandyq Ýálixanuly.
Ministrdiń aitýynsha, qazirgi kezde 1 litr alkogol óniminiń qoldanystaǵy aktsiz quny 1380 teńge bolsa, 2017 jyly bul kórsetkish 2000 teńgege ósedi. Al 2018 jyly 2275 teńgege, 2019 jyly 2550 teńgege deiin jetedi. Temekiniń 1000 danasyna salynatyn aktsiz salyǵy 2017 jyly 5000-nan 6200 teńgege deiin artady. Al 2017 jyly 7500 teńgege, 2018 jyly 8700 teńgege deiin jetpek.
Bek TÓLEÝOV
