Almatyda 3 adamnyń ómirin jalmaǵan Iliias Karǵa qatysty sot otyrysynda bolǵan oqiǵany kózimen kórgen kýágerler suraldy, dep habarlaidy QazAqparat tilshisi.
Bolǵan oqiǵany esepshi Elena Nikonova kórgen. Onyń aitýynsha, sol kúni jol ashyq, kóshe taza bolǵan. Áiel Seifýllin kóshesimen Abai dańǵylyna tańǵy 5 shamasynda baǵdarshamǵa kelip toqtaǵan.
Birneshe sekýndtan soń kóz aldynda jantúrshigerlik apat bolǵan.
«Men Mitsubishi Galant artynan kelip toqtadym. Bizdiń sol jaǵymyzda avtobýs toqtap turǵan. Ol da jol apatynyń bolýyna óz úlesin qosty desek bolady. Avtobýstyń ar jaǵynda Gelandewagen ushyp kele jatqanyn kórmedik. Galant jasyl shamǵa júrip ketti, artynan men qozǵaldym. Osy kezde kóldeneń túsken qara kóliktiń esigi kórindi. Sol sátte qatty soǵyldy, meniń kóligime áinektiń synyqtary shashyrady. Men shoktan esimdi jiyp, kóligimdi jol shetine qoiyp, oqiǵa ornyna júgirip bardym», - dedi Elena Nikonova.
Kýágerdiń aitýynsha, Galant jolaýshylary alǵashynda tiri bolǵan.
«Kólikti aýdarǵan kezde, esikter japyrylyp qalǵandyqtan, qyzdardy bagajnik arqyly alyp shyqty. Jedel járdem kelgenshe olardyń júregi soǵyp jatty», - dedi ol.
Elena Nikonova Gelandewagen júrgizýshisiniń ketip bara jatqanyn kórgen syńaily boldy.
«Men bilmeimin, múmkin qatelesetin bolarmyn. Biraq Gelandewagen júrgizýshisin eki adam kelip eki qoltyǵynan alyp bara jatqanyn kórgendei boldym. Bul apattan keiin shamamen 5 minýt ótken soń boldy. Bári esterin jiyp jan-jaǵyna qaraǵanda sol úsheýi basqa kólikke otyryp ketip bara jatqanyn kórdik. Júrgizýshiniń aiaǵy táltirektep turǵany baiqaldy. Bul apattan emes, ol anyq. Jol apatynan keýde aýyrýy múmkin. Biraq aiaqqa zaqym kelmeidi», - dedi ol.
Aita ketý kerek, qaiǵyly oqiǵa 29 jeltoqsanda bolǵan edi. Abai men Seifýllin kósheleriniń qiylysynda Mersedes Gelandewagen Mitsubishi Galant kóligimen soqtyǵysqan bolatyn. Gelandewagen kóligi baǵdarshamnyń qyzyl túsine ótip ketken. Jol apatynan 3 adam: Mitsubishi Galant júrgizýshisi men eki jolaýshy kóz jumdy.
Olardyń arasynda belgili aktrisa Sholpan Elgezek bar. Keiin belgili bolǵandai, 34 jastaǵy Gelandewagen júrgizýshisi kóligin mas kúiinde aidaǵan.
«Mercedes Gelandewagen» markaly avtomobil júrgizýshisi, 1985 jyly týǵan Kar Iliias Abai jáne Seifýllin dańǵyldarynyń qiylysynda jol apatyn jasaǵandyqtan, QR Qylmystyq-protsestik kodeksiniń 128-babyna sáikes ustaldy. Sotqa deiingi tergep-tekserýler QR Qylmystyq kodeksiniń 345-babyna jáne 347-babynyń 3-bóligine sáikes júrgizildi.
Atalǵan jol apatynan aman qalǵan jalǵyz adam - aktrisa Aizada Satybaldieva qabyrǵalary synyp, aýyr kúide aýrýhanaǵa túsken bolatyn. 2 aptadan soń aktrisanyń beti beri qarap aýrýhanadan úiine shyǵaryldy.
