Elimizdegi 1 970 mektepte sport zaly joq. Bul týraly QR Mádeniet jáne sport ministri Aqtoty Raiymqulova málim etti, dep habarlaidy "Ult aqparat".
«Óńirler usynǵan statistikalyq málimetterge sáikes, mektep oqýshylarynyń ishinde 1 mln 365 myń bala dene shynyqtyrý jáne sportpen shuǵyldanady. Bilim jáne ǵylym ministrliginiń derekteri boiynsha 2019 jyly 5 428 mektep sport zalymen qamtamasyz etilgen. Bul rette Almaty men Nur-Sultan qalalarynda, sondai-aq Atyraý, Qyzylorda, Mańǵystaý oblystarynda mektepterdi sport zaldarmen qamtamasyz etýdiń eń joǵary deńgeii baiqalady. Is júzinde mektepterdiń 37 paiyzy oqý baǵdarlarmalary aiasynda qajet sporttyq qural-jabdyqtarǵa degen tapshylyqty sezinýde», - dedi A. Raiymqulova Parlament Májilisindegi Úkimet saǵatynda.
Onyń sózine qaraǵanda, 1 970 mektepte sport zaly joq. Sonymen qatar, aýyldaǵy sport saýyqtyrý keshenderiniń jelisi aýyl turǵyndarynyń tek 30 paiyzyn ǵana qanaǵattandyrady.
«Bul jaǵdai sport sektsiialarynyń jumysy men jastardyń sport klýbtaryn qurýdy bulai tursyn, dene shynyqtyrý páni boiynsha mindetti sabaqtardy tolyq ótkizýge múmkindik bermeidi. Sondyqtan da búgingi tańda mekten tys sporttyq is-sharalardy keńetý, qosymsha bilim berý muǵalimderin tartý, mekteptiń sport kúntizbesin qalyptastyrý boiynsha áli de jumystar júrgizý qajet ekenin atap ótkim keledi», - dedi Aqtoty Raiymqulova.
Budan buryn habarlanǵandai, 2019 jyldyń qorytyndysy boiynsha elimizde dene shynyqtyrý jáne sportpen júieli túrde shuǵyldanatyndar sany 5,7 mln adamǵa jetken. Bul jalpy halyqtyń 30,6 paiyzy.
