Aqtóbeniń bas sanitarlyq dárigeri Nursulý Berkimbaeva toi, as berýdi toqtatpaǵan meiramhana ielerine eskertý jasady, dep habarlaidy "Ult aqparat".
Keshe Aqtóbede 12 adamnan koronavirýs infektsiiasy anyqtaldy. Aýyryp, dáriger kómegine júgingenderdiń ekeýi Qarǵaly aýdanynyń, tórteýi Aqtóbe qalasynyń turǵyny. Sonymen birge Hromtaý aýdanynyń 5 turǵynynan COVID-19-dyń simptomsyz túri anyqtaldy. Olardyń barlyǵy qazir dárigerler baqylaýyna alyndy.
Aita keteiik, óńirde barlyǵy 3 305 jaǵdai tirkelse, onyń 97 paiyzdan astamy jazyldy. Qazirgi 109 adam úi karantininde jatyr.
«Karantin shekteýin kúsheitý epidemiologiialyq jaǵdaiǵa bailanysty sheshiledi. Qazirgi kezde jeksenbi kúnderi iri saýda oryndary, bazarlar jumys istemeidi. Sonymen birge kóbiniń jumys ýaqyty qysqardy. Qoǵamdyq tamaqtaný oryndaryna eskertý jasaǵym keledi. Qazirgi kezde monitoring tobynyń hattamasy kóbeidi. Áli de toi, marqumnyń jylyn berdý ótkizip jatqandary bar. Adamdardyń densaýlyǵyn qaterge tigýge bolmaidy. Bul jalǵasa berse, karantin sharasy kúsheitiledi», - dedi oblystyq taýarlar men kórsetiletin qyzmettiń sapasy men qaýipsizdigin baqylaý departamentiniń basshysy Nursulý Berkimbaeva.
Aqtóbede koronavirýs infektsiiasyna shaldyqqan 21 naýqas aýrýhanada em qabyldap jatyr. Bireýi jansaqtaý bóliminde. Pnevmoniiaǵa shaldyqqan 32 naýqas ta únemi dárigerler baqylaýynda. Oblysta 315 oryn daiyn tur. Onyń tek 16 paiyzynda naýqastar emdelip jatyr.
