اقتٶبەنٸڭ باس سانيتارلىق دەرٸگەرٸ نۇرسۇلۋ بەركٸمباەۆا توي, اس بەرۋدٸ توقتاتپاعان مەيرامحانا يەلەرٸنە ەسكەرتۋ جاسادى, دەپ حابارلايدى "ۇلت اقپارات".
كەشە اقتٶبەدە 12 ادامنان كوروناۆيرۋس ينفەكتسيياسى انىقتالدى. اۋىرىپ, دەرٸگەر كٶمەگٸنە جٷگٸنگەندەردٸڭ ەكەۋٸ قارعالى اۋدانىنىڭ, تٶرتەۋٸ اقتٶبە قالاسىنىڭ تۇرعىنى. سونىمەن بٸرگە حرومتاۋ اۋدانىنىڭ 5 تۇرعىنىنان COVID-19-دىڭ سيمپتومسىز تٷرٸ انىقتالدى. ولاردىڭ بارلىعى قازٸر دەرٸگەرلەر باقىلاۋىنا الىندى.
ايتا كەتەيٸك, ٶڭٸردە بارلىعى 3 305 جاعداي تٸركەلسە, ونىڭ 97 پايىزدان استامى جازىلدى. قازٸرگٸ 109 ادام ٷي كارانتينٸندە جاتىر.
«كارانتين شەكتەۋٸن كٷشەيتۋ ەپيدەميولوگييالىق جاعدايعا بايلانىستى شەشٸلەدٸ. قازٸرگٸ كەزدە جەكسەنبٸ كٷندەرٸ ٸرٸ ساۋدا ورىندارى, بازارلار جۇمىس ٸستەمەيدٸ. سونىمەن بٸرگە كٶبٸنٸڭ جۇمىس ۋاقىتى قىسقاردى. قوعامدىق تاماقتانۋ ورىندارىنا ەسكەرتۋ جاساعىم كەلەدٸ. قازٸرگٸ كەزدە مونيتورينگ توبىنىڭ حاتتاماسى كٶبەيدٸ. ەلٸ دە توي, مارقۇمنىڭ جىلىن بەردۋ ٶتكٸزٸپ جاتقاندارى بار. ادامداردىڭ دەنساۋلىعىن قاتەرگە تٸگۋگە بولمايدى. بۇل جالعاسا بەرسە, كارانتين شاراسى كٷشەيتٸلەدٸ», - دەدٸ وبلىستىق تاۋارلار مەن كٶرسەتٸلەتٸن قىزمەتتٸڭ ساپاسى مەن قاۋٸپسٸزدٸگٸن باقىلاۋ دەپارتامەنتٸنٸڭ باسشىسى نۇرسۇلۋ بەركٸمباەۆا.
اقتٶبەدە كوروناۆيرۋس ينفەكتسيياسىنا شالدىققان 21 ناۋقاس اۋرۋحانادا ەم قابىلداپ جاتىر. بٸرەۋٸ جانساقتاۋ بٶلٸمٸندە. پنەۆمونيياعا شالدىققان 32 ناۋقاس تا ٷنەمٸ دەرٸگەرلەر باقىلاۋىندا. وبلىستا 315 ورىن دايىن تۇر. ونىڭ تەك 16 پايىزىندا ناۋقاستار ەمدەلٸپ جاتىر.
