Aqtóbe qalasynyń ákimi múmkindigi shekteýli jandarmen kezdesip, qalany qolarbamen aralap shyqty, dep habarlaidy QazAqparat.
Aqtóbe qalasynda jol jóndeý, júrginshiler jolyn salý qarqyn aldy. Bul jobalardyń basym bóliginde qolarbamen qozǵalatyn adamdardyń suranysy eskerýsiz qalǵan. Olqylyqty «Pandýs OK» JShS basshysy, qalalyq qoǵamdyq keńes múshesi Shahan Joldasbaev qala ákimine aitty.
«Ózim qolarbamen júremin. Jinalystarda ákimge eskertý berip, aitqan edim. Ol ózi kórip, qarap, synaqtan ótkizýge ýáde berdi. Men bar ómirimdi múmkindigi shekteýli adamdardyń qozǵalysyn jeńildetýge arnadym. Eýropa elderi sekildi kedergisiz júrip, kez kelgen áleýmettik nysanǵa kirýdi qalaimyz. Árqaisysynyń óz talaby, erejesi bar. Sol eskerilse, adamdarmen aralasý bizderge jeńildeidi», - dedi Sh.Joldasbaev.
Aita keteiik, Aqtóbe qalasynda 12 myńnan astam múmkindigi shekteýli jan bar. Olardyń 2 myńnan astamy balady. Biyl qaladaǵy «Invataksi» qyzmetine jergilikti biýdjetten 39 million teńgeden astam qarjy bólingen. Barlyǵy 12 kólik tasymaldaýmen ainalysady.
«Qaladaǵy áleýmettik nysandardyń da talapqa sai bolmaǵany anyqtaldy. Tipti memlekettik mekemelerde de múmkindigi shekteýli jandarǵa qoljetimsiz eken. Ózim arbaǵa otyryp, biraz jerdi araladym. Ár kedergini anyq kórip, sezinip, qinalyp otyrmyn. Barlyq kópqabatty úige pandýs salyp, jiektastardyń kedergilerin joiý qajet eken. Aldaǵy ýaqytta karta jasalady. Arnaiy monitoring top sheshim shyǵarady. Adami iske kóp aqsha da qajet emes. Bul bizdiń qateligimiz», - dedi qala ákimi Ashat Shaharov.
Aldymen eskertý berilip, keiin aiyppul salynady.
