Aqtóbe oblysynyń ákimi Ońdasyn Orazalin tikelei efir kezinde koronavirýs, pnevmoniiamen kúres jumystaryn aityp berdi, dep habarlaidy "Ult aqparat".
Aqtóbe oblysy boiynsha 2 myńǵa jýyq adam indetke shaldyqqan. Sońǵy táýlikte 49 adam koronavirýs juqtyrdy. Sonymen birge pnevmoniiaǵa shaldyqqandar oblys ortalyǵyndaǵy 6 aýrýhanada em qabyldap jatyr.
«Ekinshi tolqyn tek kúzde keledi» degen boljamǵa súienip, soǵan sai jospar qurylǵan bolatyn. Deiturǵanmen ómir óz degenin istedi. Eýropada, Italiia, Ispaniia elderinde bolǵan jaǵdai bizge kelip jetti. Eń kóp alańdatqany – pnevmoniianyń órtip ketýi. Kúrdeli jaǵdaida da atqarýshy bilik shuǵyl áreket jasady. Qazirgi kezde koronavirýstan góri pnevmoniia alańdatyp otyr. Birinshiden, naýqastardyń jatatyn oryn sanyn 50 paiyzǵa, iaǵni, bastapqydan úsh esege deiin kóbeittik. Qazir oblysta 3 300 oryn bar. Sońǵy aptanyń ózinde 924 oryndyq 3 prozizorlyq emdeý orny ashyldy. Olar: Aqqaǵaz Dosjanova atyndaǵy jataqhana, «Darý» medtsinalyq ortalyǵy, «Shaǵala» shipajaiy. Onyń 70 paiyzy qoldanyldy. Taǵy 715 kereýet bar. Sondai-aq emhanalarda 725 oryndyq kúndizdi statsionar ashyldy. Kúnine 150-200 adam em qabyldaidy. Nátijesinde maýsym aiynda 1 myńǵa jýyq adam emdelip shyqty. Óńirde 150-ge jýyq ókpeni jasandy jeldetý apparaty bar. 19 rentgen, 15 KT apparaty bar. Ottekpen tolyq qamtamasyz etilgen. Dári-dármek emdeý oryndarynda jetkilikti. Reseimen kelisim bar. Búgin taǵy 10 túrli dári jetkiziledi. Biz 14-20 kúnge qajetti dári-dármek qoryn jasap aldyq», - dedi oblys ákimi Ońdasyn Orazalin.
Indetpen kúres jumystaryna infektsionister ǵana emes, barlyq dáriger jumyldyryldy. Barlyǵy 2800-ge jýyq medtsina qyzmetkeri jumys istep júr. Sonymen birge 100-den astam oqytýshy-professor qyzmetke kiristi. Meditsinalyq oqý oryndaryn bitirgen túlekterdi de túgel osy qatarǵa qosylǵan.
«Aýrýhanalarda oryn jetpeidi, dálizde jatyp qalǵan» degen derek joq. Tikelei aralap, naýqastarmen kezdestim. Úiden em alyp jatqandar úshin arnaiy call ortalyq ashyldy. Onda oqytýshy-professorlar jumys isteidi. Tikelei em jolyn aitady. Beinekeńes berilip jatyr», - dedi Ońdasyn Orazalin.
Aita keteiik, maýsym aiynda 120-130 adam pnevmoniiamen aýrýhanaǵa tússe, qazir 70-80 adamǵa azaidy.
